tera ruKH-e-muKHattat quran hai hamara

terā ruḳh-e-muḳhattat qur.ān hai hamārā

bosa bhī leñ to kyā hai īmān hai hamārā

gar hai ye be-qarārī to rah chukā baġhal meñ

do roz dil hamārā mehmān hai hamārā

haiñ is ḳharāb dil se mash.hūr shahr-e-ḳhūbāñ

is saarī bastī meñ ghar vīrān hai hamārā

mushkil bahut hai ham sā phir koī haath aanā

yuuñ mārnā to pyāre āsān hai hamārā

idrīs o ḳhizr o iisā qātil se ham chhuḌā.e

un ḳhūñ-giraftagāñ par ehsān hai hamārā

ham ve haiñ sun rakho tum mar jaa.eñ ruk ke yakjā

kyā kūcha kūcha phirnā unvān hai hamārā

haiñ said-gah ke merī sayyād kyā na dhaḌke

kahte haiñ said jo hai be-jān hai hamārā

karte haiñ bāteñ kis kis hañgāme kī ye zāhid

dīvān-e-hashr goyā dīvān hai hamārā

ḳhurshīd-rū kā partav āñkhoñ meñ roz haigā

yaanī ki sharq-rūya dālān hai hamārā

māhiyyat-e-do-ālam khātī phire hai ġhote

yak qatra ḳhuun ye dil tūfān hai hamārā

naale meñ apne har shab aate haiñ ham bhī pinhāñ

ġhāfil tirī galī meñ mindān hai hamārā

kyā ḳhāndāñ kā apne tujh se kaheñ taqaddus

rūhul-qudus ik adnā darbān hai hamārā

kartā hai kaam vo dil jo aql meñ na aave

ghar kā mushīr kitnā nādān hai hamārā

jī jā na aah zālim terā hī to hai sab kuchh

kis muñh se phir kaheñ jī qurbān hai hamārā

banjar zamīn dil kī hai 'mīr' milk apnī

pur-dāġh siina mohr-e-farmān hai hamārā

tera ruKH-e-muKHattat quran hai hamara

bosa bhi len to kya hai iman hai hamara

gar hai ye be-qarari to rah chuka baghal mein

do roz dil hamara mehman hai hamara

hain is KHarab dil se mashhur shahr-e-KHuban

is sari basti mein ghar viran hai hamara

mushkil bahut hai hum sa phir koi hath aana

yun marna to pyare aasan hai hamara

idris o KHizr o isa qatil se hum chhuDae

un KHun-giraftagan par ehsan hai hamara

hum we hain sun rakho tum mar jaen ruk ke yakja

kya kucha kucha phirna unwan hai hamara

hain said-gah ke meri sayyaad kya na dhaDke

kahte hain said jo hai be-jaan hai hamara

karte hain baaten kis kis hangame ki ye zahid

diwan-e-hashr goya diwan hai hamara

KHurshid-ru ka partaw aankhon mein roz haiga

yani ki sharq-ruya dalan hai hamara

mahiyyat-e-do-alam khati phire hai ghote

yak qatra KHun ye dil tufan hai hamara

nale mein apne har shab aate hain hum bhi pinhan

ghafil teri gali mein mindan hai hamara

kya KHandan ka apne tujh se kahen taqaddus

ruhul-qudus ek adna darban hai hamara

karta hai kaam wo dil jo aql mein na aawe

ghar ka mushir kitna nadan hai hamara

ji ja na aah zalim tera hi to hai sab kuchh

kis munh se phir kahen ji qurban hai hamara

banjar zamin dil ki hai 'mir' milk apni

pur-dagh sina mohr-e-farman hai hamara