tere aalam ka yar kya kahna

tere aalam kā yaar kyā kahnā

har taraf hai pukār kyā kahnā

uff na kī dard-e-hijr zabt kiyā

ai dil-e-be-qarār kyā kahnā

va.ada-e-vasl un se luuñ kyūñ-kar

merā kyā iḳhtiyār kyā kahnā

kyā hī nairañgiyāñ dikhā.ī haiñ

mere bāġh-o-bahār kyā kahnā

kaise āshiq haiñ un se jab pūchhā

bole be-iḳhtiyār kyā kahnā

musht par bhī guloñ ke gard rahe

āfrīñ ai hazār kyā kahnā

tirchhī nazreñ chhurī kaTārī haiñ

chashm-e-bad-dūr yaar kyā kahnā

gulshanoñ meñ ye rañg-rūp kahā

lā-javāb ai nigār kyā kahnā

dam-e-īsā ko maat kartī hai

ai nasīm-e-bahār kyā kahnā

imtihāñ kar chuke to vo bole

ai mire jāñ-nisār kyā kahnā

us ke kūche meñ baiTh kar na uThā

vaah mere ġhubār kyā kahnā

jānte haiñ ki jaan doge 'sharaf'

us ko phir baar baar kyā kahnā

tere aalam ka yar kya kahna

har taraf hai pukar kya kahna

uff na ki dard-e-hijr zabt kiya

ai dil-e-be-qarar kya kahna

wada-e-wasl un se lun kyun-kar

mera kya iKHtiyar kya kahna

kya hi nairangiyan dikhai hain

mere bagh-o-bahaar kya kahna

kaise aashiq hain un se jab puchha

bole be-iKHtiyar kya kahna

musht par bhi gulon ke gard rahe

aafrin ai hazar kya kahna

tirchhi nazren chhuri kaTari hain

chashm-e-bad-dur yar kya kahna

gulshanon mein ye rang-rup kaha

la-jawab ai nigar kya kahna

dam-e-isa ko mat karti hai

ai nasim-e-bahaar kya kahna

imtihan kar chuke to wo bole

ai mere jaan-nisar kya kahna

us ke kuche mein baiTh kar na uTha

wah mere ghubar kya kahna

jaante hain ki jaan doge 'sharaf'

us ko phir bar bar kya kahna