tere andaz-e-takallum ka sahaara le kar

tere andāz-e-takallum kā sahārā le kar

jiit ā.eñge jahāñ shauq tumhārā le kar

qibla-e-ahl-e-junūñ merī riyāzat kā ajr

rāh-e-pur-ḳhār kā lauTā huuñ nazārā le kar

gor-kan dard kā marqad to banānā lekin

hijr-e-mahjūr tū pahlū se hamārā le kar

lauh-e-aflāk pe raushan hai hamārā chehra

ishq-e-pur-nūr kī izzat kā sitāra le kar

vo mire baad zamāne ko rulā kar bolā

dil-e-barbād kā aayā huuñ ḳhasāra le kar

shahr kā shahr sharāboñ se sivā bahkā hai

aap kī aañkh se halkā sā ishāra le kar

dard-e-dil-gīr kī shiddat kā nazārā karnā

sarsarī hijr manā lenā udhārā le kar

hijr-e-māshūq hai tūlānī to ab umr 'ḳhalīl'

hazrat-e-ḳhizr kī ā.ūñgā dobāra le kar

tere andaz-e-takallum ka sahaara le kar

jit aaenge jahan shauq tumhaara le kar

qibla-e-ahl-e-junun meri riyazat ka ajr

rah-e-pur-KHar ka lauTa hun nazara le kar

gor-kan dard ka marqad to banana lekin

hijr-e-mahjur tu pahlu se hamara le kar

lauh-e-aflak pe raushan hai hamara chehra

ishq-e-pur-nur ki izzat ka sitara le kar

wo mere baad zamane ko rula kar bola

dil-e-barbaad ka aaya hun KHasara le kar

shahr ka shahr sharabon se siwa bahka hai

aap ki aankh se halka sa ishaara le kar

dard-e-dil-gir ki shiddat ka nazara karna

sarsari hijr mana lena udhaara le kar

hijr-e-mashuq hai tulani to ab umr 'KHalil'

hazrat-e-KHizr ki aaunga dobara le kar