tere be-rabt bayanat se KHauf aata hai

tere be-rabt bayānāt se ḳhauf aatā hai

mujh ko ab shahr ke hālāt se ḳhauf aatā hai

avval avval maiñ samajhtā thā masīhā tujh ko

munsifā ab tirī har baat se ḳhauf aatā hai

ham junūñ-ḳhez mizājoñ ko nahīñ tāb-e-shu.ūr

vā.iz-e-shahr ke ḳhutbāt se ḳhauf aatā hai

haañ mujhe gosha-nashīnī se bahut ulfat thī

ab magar shorish-e-jazbāt se ḳhauf aatā hai

pahle suntā thā baḌe shauq se afsāna mirā

ab use merī hikāyāt se ḳhauf aatā hai

merī āñkhoñ meñ talātum tirī āñkhoñ meñ sukūn

bas mujhe aise tazādāt se ḳhauf aatā hai

tere be-rabt bayanat se KHauf aata hai

mujh ko ab shahr ke haalat se KHauf aata hai

awwal awwal main samajhta tha masiha tujh ko

munsifa ab teri har baat se KHauf aata hai

hum junun-KHez mizajon ko nahin tab-e-shuur

waiz-e-shahr ke KHutbaat se KHauf aata hai

han mujhe gosha-nashini se bahut ulfat thi

ab magar shorish-e-jazbaat se KHauf aata hai

pahle sunta tha baDe shauq se afsana mera

ab use meri hikayat se KHauf aata hai

meri aankhon mein talatum teri aankhon mein sukun

bas mujhe aise tazadat se KHauf aata hai