tere chehre ko be-naqab karen

tere chehre ko be-naqāb kareñ

zindagī chal tirā hisāb kareñ

ham pe kaisī hai ye sanak haavī

jo banāyā hai vo ḳharāb kareñ

is se ham baa'd meñ kareñge vuzū

pahle is aab ko sharāb kareñ

sab kā apnā maqām hotā hai

kyoñ charāġhoñ ko āftāb kareñ

ham kahāñ haiñ hameñ nahīñ mālūm

kis tarah ḳhud ko dastiyāb kareñ

koī shikva na dil meñ rah jaa.e

aao baiTho chalo hisāb kareñ

kho chuke haiñ ka.ī varaq apne

ḳhud ko ham kis tarah kitāb kareñ

tere chehre ko be-naqab karen

zindagi chal tera hisab karen

hum pe kaisi hai ye sanak hawi

jo banaya hai wo KHarab karen

is se hum ba'd mein karenge wuzu

pahle is aab ko sharab karen

sab ka apna maqam hota hai

kyon charaghon ko aaftab karen

hum kahan hain hamein nahin malum

kis tarah KHud ko dastiyab karen

koi shikwa na dil mein rah jae

aao baiTho chalo hisab karen

kho chuke hain kai waraq apne

KHud ko hum kis tarah kitab karen