tere ehsas ko KHushbu banate

tere ehsās ko ḳhushbū banāte

jo bas chaltā tujhe urdu banāte

yaqīnan is se to behtar hī hotī

vo ik duniyā jo maiñ aur tū banāte

miTāne kī kabhī naubat na aatī

jo mere naam kā tattō banāte

vo jis meñ saarī duniyā Duub jaa.e

terī furqat meñ vo aañsū banāte

ilāhī tā-qayāmat nāchnā thā

so merī ḳhaak se ghuñghrū banāte

kisī din tīrgī ke canvas par

tumhārī shab ke jugnū banāte

tere ehsas ko KHushbu banate

jo bas chalta tujhe urdu banate

yaqinan is se to behtar hi hoti

wo ek duniya jo main aur tu banate

miTane ki kabhi naubat na aati

jo mere nam ka tattoo banate

wo jis mein sari duniya Dub jae

teri furqat mein wo aansu banate

ilahi ta-qayamat nachna tha

so meri KHak se ghunghru banate

kisi din tirgi ke canwas par

tumhaari shab ke jugnu banate