tere halke se tabassum ka ishaara bhi to ho

tere halke se tabassum kā ishārā bhī to ho

tā sar-e-dār pahuñchne kā sahārā bhī to ho

shikva o tanz se bhī kaam nikal jaate haiñ

ġhairat-e-ishq ko lekin ye gavārā bhī to ho

mai-kashoñ meñ na sahī tishna-laboñ meñ hī sahī

koī gosha tirī mahfil meñ hamārā bhī to ho

kis taraf moḌ deñ TuuTī huī kashtī apnī

aise tūfāñ meñ kahīñ koī kinārā bhī to ho

hai ġham-e-ishq meñ ik lazzat-e-jāved magar

is ġham-e-dahr se ai dil koī chārā bhī to ho

mai-kade bhar pe tirā haq hai magar pīr-e-muġhāñ

ik kisī chiiz pe rindoñ kā ijārā bhī to ho

ashk-e-ḳhūnīñ se jo sīñche the bayābāñ ham ne

un meñ ab laala o nasrīñ kā nazārā bhī to ho

jaam ubal paḌte haiñ mai luTtī hai ḳhum TūTte haiñ

nigah-e-nāz kā dar-parda ishārā bhī to ho

pī to luuñ āñkhoñ meñ umDe hue aañsū lekin

dil pe qaabū bhī to ho zabt kā yaarā bhī to ho

aap is vādi-e-vīrāñ meñ kahāñ aa pahuñche

maiñ gunahgār magar maiñ ne pukārā bhī to ho

tere halke se tabassum ka ishaara bhi to ho

ta sar-e-dar pahunchne ka sahaara bhi to ho

shikwa o tanz se bhi kaam nikal jate hain

ghairat-e-ishq ko lekin ye gawara bhi to ho

mai-kashon mein na sahi tishna-labon mein hi sahi

koi gosha teri mahfil mein hamara bhi to ho

kis taraf moD den TuTi hui kashti apni

aise tufan mein kahin koi kinara bhi to ho

hai gham-e-ishq mein ek lazzat-e-jawed magar

is gham-e-dahr se ai dil koi chaara bhi to ho

mai-kade bhar pe tera haq hai magar pir-e-mughan

ek kisi chiz pe rindon ka ijara bhi to ho

ashk-e-KHunin se jo sinche the bayaban hum ne

un mein ab lala o nasrin ka nazara bhi to ho

jam ubal paDte hain mai luTti hai KHum TuTte hain

nigah-e-naz ka dar-parda ishaara bhi to ho

pi to lun aankhon mein umDe hue aansu lekin

dil pe qabu bhi to ho zabt ka yara bhi to ho

aap is wadi-e-viran mein kahan aa pahunche

main gunahgar magar main ne pukara bhi to ho