tere har jaur pe yan shukr-e-KHuda hai ai dost

tere har jaur pe yaañ shukr-e-ḳhudā hai ai dost

ki yahī maslak-e-arbāb-e-vafā hai ai dost

ham ko is ahd-e-vafā se thiiñ umīdeñ kitnī

tujh ko jo ahd-e-vafā bhuul chukā hai ai dost

terī jānib se na laa.ī koī paiġhām kabhī

merī fariyād bhī sahrā kī sadā hai ai dost

tere aane kī dobāra jo koī aas nahīñ

kitnī sunsān mire dil kī fazā hai ai dost

terī yādoñ se bhī taskīn-e-tamannā na huī

vaqt ham par kabhī aisā bhī paḌā hai ai dost

kyā ajab hai ki tirī ranjish-e-bejā ke sabab

tere 'shafqat' ko sar-e-tark-e-vafā hai ai dost

tere har jaur pe yan shukr-e-KHuda hai ai dost

ki yahi maslak-e-arbab-e-wafa hai ai dost

hum ko is ahd-e-wafa se thin umiden kitni

tujh ko jo ahd-e-wafa bhul chuka hai ai dost

teri jaanib se na lai koi paigham kabhi

meri fariyaad bhi sahra ki sada hai ai dost

tere aane ki dobara jo koi aas nahin

kitni sunsan mere dil ki faza hai ai dost

teri yaadon se bhi taskin-e-tamanna na hui

waqt hum par kabhi aisa bhi paDa hai ai dost

kya ajab hai ki teri ranjish-e-beja ke sabab

tere 'shafqat' ko sar-e-tark-e-wafa hai ai dost