tere honThon ke tabassum ka talabgar hun main

tere hoñThoñ ke tabassum kā talabgār huuñ maiñ

apne ġham bech de raddī kā ḳharīdār huuñ maiñ

merī hālat pe takabbur nahīñ afsos bhī kar

terā āshiq nahīñ jānāñ tirā bīmār huuñ maiñ

kal tirī hosh-ruhā.ī se huā thā āzād

aaj phir ik na.e jaadū meñ giraftār huuñ maiñ

in dinoñ yuuñ ki tirā ishq garāñ hai mujh par

be-dilī aisī ke apne se hī bezār huuñ maiñ

mere har ġham kī kifālat bhī mirā zimma hai

apne ġham-ḳhāna-e-hastī kā azādār huuñ maiñ

hañste hañste mirī āñkhoñ meñ namī aa ga.ī hai

tū ne dekhā nahīñ kis darja adākār huuñ maiñ

tere honThon ke tabassum ka talabgar hun main

apne gham bech de raddi ka KHaridar hun main

meri haalat pe takabbur nahin afsos bhi kar

tera aashiq nahin jaanan tera bimar hun main

kal teri hosh-ruhai se hua tha aazad

aaj phir ek nae jadu mein giraftar hun main

in dinon yun ki tera ishq garan hai mujh par

be-dili aisi ke apne se hi bezar hun main

mere har gham ki kifalat bhi mera zimma hai

apne gham-KHana-e-hasti ka azadar hun main

hanste hanste meri aankhon mein nami aa gai hai

tu ne dekha nahin kis darja adakar hun main