tere jalwon ki chah ne mara

tere jalvoñ kī chaah ne maarā

barq-e-zer-e-nigāh ne maarā

dostoñ ke karam bhī bhuul ga.e

ġhair kī rasm-o-rāh ne maarā

naala naala ne jaan lī merī

haañ mujhe aah aah ne maarā

qaidī-e-dām-e-sub.h-o-shām haiñ ham

is saped-o-siyāh ne maarā

ai ḳhushā-baḳht aarzū bar aa.ī

nāvak ik ḳhair-ḳhvāh ne maarā

sitam-e-mustaqil se ḳhauf na thā

karam-e-gāh-gāh ne maarā

bach ke rahnā muhāl thā 'fitrat'

dost kī har nigāh ne maarā

tere jalwon ki chah ne mara

barq-e-zer-e-nigah ne mara

doston ke karam bhi bhul gae

ghair ki rasm-o-rah ne mara

nala nala ne jaan li meri

han mujhe aah aah ne mara

qaidi-e-dam-e-subh-o-sham hain hum

is saped-o-siyah ne mara

ai KHusha-baKHt aarzu bar aai

nawak ek KHair-KHwah ne mara

sitam-e-mustaqil se KHauf na tha

karam-e-gah-gah ne mara

bach ke rahna muhaal tha 'fitrat'

dost ki har nigah ne mara