tere mahal mein kaise basar ho isko to girai bahut hai

tere mahal meñ kaise basar ho is kī to gīrā.ī bahut hai

maiñ ghar kī añgnā.ī meñ ḳhush huuñ mere liye añgnā.ī bahut hai

apnī apnī zaat meñ gum haiñ ahl-e-dil bhī ahl-e-nazar bhī

mahfil meñ dil kyuuñ kar bahle mahfil meñ tanhā.ī bahut hai

ġharq-e-dariyā honā yaaro 'ġhālib' ne kyuuñ chāhā āḳhir

aisī marg-e-lā-vāris meñ socho to rusvā.ī bahut hai

dushman se ghabrānā abas hai ġhair se Darnā bhī lā-hāsil

kul kā ghātak ghar kā bhedī ek vibhīshan bhaa.ī bahut hai

barsoñ meñ ik jogī lauTā jañgal meñ phir jot jagā.ī

kahne lagā ai bhole shañkar shahroñ meñ mahñgā.ī bahut hai

apnī dhartī hī ke dukh-sukh ham in sheroñ meñ kahte haiñ

ham ko himāla se kyā matlab us kī to ūñchā.ī bahut hai

pursish-e-ġham ko ḳhud nahīñ aa.e un kā magar paiġhām to aayā

hijr kī rut meñ jān-e-hazīñ ko duur kī ye shahnā.ī bahut hai

dil kī kitābeñ paḌh nahīñ saktā lekin chehre paḌh letā huuñ

Dhaltī umr kī dhuup meñ 'sāhir' itnī bhī bīnā.ī bahut hai

tere mahal mein kaise basar ho is ki to girai bahut hai

main ghar ki angnai mein KHush hun mere liye angnai bahut hai

apni apni zat mein gum hain ahl-e-dil bhi ahl-e-nazar bhi

mahfil mein dil kyun kar bahle mahfil mein tanhai bahut hai

gharq-e-dariya hona yaro 'ghaalib' ne kyun chaha aaKHir

aisi marg-e-la-waris mein socho to ruswai bahut hai

dushman se ghabrana abas hai ghair se Darna bhi la-hasil

kul ka ghatak ghar ka bhedi ek wibhishan bhai bahut hai

barson mein ek jogi lauTa jangal mein phir jot jagai

kahne laga ai bhole shankar shahron mein mahngai bahut hai

apni dharti hi ke dukh-sukh hum in sheron mein kahte hain

hum ko himala se kya matlab us ki to unchai bahut hai

pursish-e-gham ko KHud nahin aae un ka magar paigham to aaya

hijr ki rut mein jaan-e-hazin ko dur ki ye shahnai bahut hai

dil ki kitaben paDh nahin sakta lekin chehre paDh leta hun

Dhalti umr ki dhup mein 'sahir' itni bhi binai bahut hai