tere qadmon ki aahaT ko tarsa hun

tere qadmoñ kī aahaT ko tarsā huuñ

maiñ bhī terā bhūlā huā ik rastā huuñ

biite lamhoñ ke jhoñke jab aate haiñ

pal do pal ko maiñ phir se khil uThtā huuñ

mujh se muzhda na.ī rutoñ kā pāoge

yaaro maiñ is peḌ kā antim pattā huuñ

shāyad tum bhī ab na mujhe pahchān sako

ab maiñ ḳhud ko apne jaisā lagtā huuñ

aaj ke kaale saa.e kal tak phaileñge

mere bachcho maiñ is baat se Dartā huuñ

tum bhī kaise DhūñD sakoge ab mujh ko

maiñ ḳhud apne-āp se ojhal rahtā huuñ

sāyoñ kī ḳhvāhish ne mujhe jalāyā hai

ab maiñ in ke naam se tapne lagtā huuñ

mujh se mil kar kis ko yaqīn ab aa.egā

maiñ bhī terā TuuTā huā ik rishta huuñ

tere qadmon ki aahaT ko tarsa hun

main bhi tera bhula hua ek rasta hun

bite lamhon ke jhonke jab aate hain

pal do pal ko main phir se khil uThta hun

mujh se muzhda nai ruton ka paoge

yaro main is peD ka antim patta hun

shayad tum bhi ab na mujhe pahchan sako

ab main KHud ko apne jaisa lagta hun

aaj ke kale sae kal tak phailenge

mere bachcho main is baat se Darta hun

tum bhi kaise DhunD sakoge ab mujh ko

main KHud apne-ap se ojhal rahta hun

sayon ki KHwahish ne mujhe jalaya hai

ab main in ke nam se tapne lagta hun

mujh se mil kar kis ko yaqin ab aaega

main bhi tera TuTa hua ek rishta hun