tere qarib aa ke baDi uljhanon mein hun

tere qarīb aa ke baḌī uljhanoñ meñ huuñ

maiñ dushmanoñ meñ huuñ ki tire dostoñ meñ huuñ

mujh se gurez-pā hai to har rāsta badal

maiñ sañg-e-rāh huuñ to sabhī rāstoñ meñ huuñ

tū aa chukā hai sat.h pe kab se ḳhabar nahīñ

bedard maiñ abhī unhīñ gahrā.iyoñ meñ huuñ

ai yār-e-ḳhush-dayār tujhe kyā ḳhabar ki maiñ

kab se udāsiyoñ ke ghane jañgaloñ meñ huuñ

tū luuT kar bhī ahl-e-tamannā ko ḳhush nahīñ

yaañ luT ke bhī vafā ke inhī qāfiloñ meñ huuñ

badlā na mere baad bhī mauzū-e-guftugū

maiñ jā chukā huuñ phir bhī tirī mahfiloñ meñ huuñ

mujh se bichhaḌ ke tū bhī to ro.egā umr bhar

ye soch le ki maiñ bhī tirī ḳhvāhishoñ meñ huuñ

tū hañs rahā hai mujh pe mirā haal dekh kar

aur phir bhī maiñ sharīk tire qahqahoñ meñ huuñ

ḳhud hī misāl-e-lāla-e-sahrā lahū lahū

aur ḳhud 'farāz' apne tamāshā.iyoñ meñ huuñ

tere qarib aa ke baDi uljhanon mein hun

main dushmanon mein hun ki tere doston mein hun

mujh se gurez-pa hai to har rasta badal

main sang-e-rah hun to sabhi raston mein hun

tu aa chuka hai sath pe kab se KHabar nahin

bedard main abhi unhin gahraiyon mein hun

ai yar-e-KHush-dayar tujhe kya KHabar ki main

kab se udasiyon ke ghane jangalon mein hun

tu luT kar bhi ahl-e-tamanna ko KHush nahin

yan luT ke bhi wafa ke inhi qafilon mein hun

badla na mere baad bhi mauzu-e-guftugu

main ja chuka hun phir bhi teri mahfilon mein hun

mujh se bichhaD ke tu bhi to roega umr bhar

ye soch le ki main bhi teri KHwahishon mein hun

tu hans raha hai mujh pe mera haal dekh kar

aur phir bhi main sharik tere qahqahon mein hun

KHud hi misal-e-lala-e-sahra lahu lahu

aur KHud 'faraaz' apne tamashaiyon mein hun