tere rahne ko munasib tha ki chhappar hota

tere rahne ko munāsib thā ki chhappar hotā

ki na chaukhaT tirī hotī na mirā sar hotā

qismat-e-najd kā gar qais commissioner hotā

lady-lailā kī havā-ḳhorī ko motor hotā

ġhair mil-jul ke uThā lete ki the be-ġhairat

go pahāḌ aap ke ehsān kā chhappar hotā

chaa.e meñ Daal kar ushshāq use pī jaate

dar-haqīqat lab-e-ma.ashūq jo shakkar hotā

malak-ul-maut pe jhalne ko banātā maiñ chañvar

tā.er-e-rūh kī dam meñ jo koī par hotā

le hī letā lab-e-dildār kā bosa uḌ kar

kaash āshiq jo banāyā thā to machchhar hotā

Thokareñ ġhair ke marqad pe lagātā kyuuñ kar

boot kī jā pe jo tū pahne slēper hotā

chāTtā saarī kitāboñ ko baġhair az-diqqat

ilm kā shauq jise hai jo vo jheñgar hotā

paas kartā resolution ki hasīnoñ pe ho tex

maiñ kabhī municipality kā jo member hotā

lucknow se shab-e-yak-shamba bareilly aate

paañv meñ gar na 'zarīf' apne sanīchar hotā

tere rahne ko munasib tha ki chhappar hota

ki na chaukhaT teri hoti na mera sar hota

qismat-e-najd ka gar qais commissioner hota

lady-laila ki hawa-KHori ko motor hota

ghair mil-jul ke uTha lete ki the be-ghairat

go pahaD aap ke ehsan ka chhappar hota

chae mein Dal kar ushshaq use pi jate

dar-haqiqat lab-e-mashuq jo shakkar hota

malak-ul-maut pe jhalne ko banata main chanwar

taer-e-ruh ki dam mein jo koi par hota

le hi leta lab-e-dildar ka bosa uD kar

kash aashiq jo banaya tha to machchhar hota

Thokaren ghair ke marqad pe lagata kyun kar

boot ki ja pe jo tu pahne sleeper hota

chaTta sari kitabon ko baghair az-diqqat

ilm ka shauq jise hai jo wo jhengar hota

pas karta resolution ki hasinon pe ho tex

main kabhi municipality ka jo member hota

lucknow se shab-e-yak-shamba bareilly aate

panw mein gar na 'zarif' apne sanichar hota