teri be-iltifati kya koi kam hoti jati hai

terī be-iltifātī kyā koī kam hotī jaatī hai

tabī'at rafta rafta ḳhūgar-e-ġham hotī jaatī hai

hazāroñ chāra-gar haiñ aur ġham baḌhte hī jaate haiñ

jo sūrat dekhiye tasvīr-e-mātam hotī jaatī hai

tasallī aap ne dī farq hai haañ dil kī hālat meñ

jo tham tham kar ḳhalish hotī thī paiham hotī jaatī hai

jo chingārī thī pahle ab vo bijlī ban ga.ī baḌh kar

mohabbat 'umr Dhal jaane se kyā kam hotī jaatī hai

nazar kyā aap kī badlī mizāj-e-zindagī badlā

jo pahle jāñ-fazā thī mai vahī kam hotī jaatī hai

kisī kā ġham samo.e jaatā hai rag rag meñ rang aise

ki apnī zindagī husn-e-mujassam hotī jaatī hai

na ehsās-e-ġham-e-jānāñ na ehsās-e-ġham-e-daurāñ

to kyuuñ mānūs-e-girya chashm-e-pur-nam hotī jaatī hai

sab ulTī paḌ rahī haiñ shāyad āzādī kī tadbīreñ

ki zanjīr-e-mohabbat aur mohkam hotī jaatī hai

'jigar' kyā taab lā saktā hai koī dil meñ zaḳhmoñ kī

magar kuchh ġhaib se tadbīr-e-marham hotī jaatī hai

teri be-iltifati kya koi kam hoti jati hai

tabi'at rafta rafta KHugar-e-gham hoti jati hai

hazaron chaara-gar hain aur gham baDhte hi jate hain

jo surat dekhiye taswir-e-matam hoti jati hai

tasalli aap ne di farq hai han dil ki haalat mein

jo tham tham kar KHalish hoti thi paiham hoti jati hai

jo chingari thi pahle ab wo bijli ban gai baDh kar

mohabbat 'umr Dhal jaane se kya kam hoti jati hai

nazar kya aap ki badli mizaj-e-zindagi badla

jo pahle jaan-faza thi mai wahi kam hoti jati hai

kisi ka gham samoe jata hai rag rag mein rang aise

ki apni zindagi husn-e-mujassam hoti jati hai

na ehsas-e-gham-e-jaanan na ehsas-e-gham-e-dauran

to kyun manus-e-girya chashm-e-pur-nam hoti jati hai

sab ulTi paD rahi hain shayad aazadi ki tadbiren

ki zanjir-e-mohabbat aur mohkam hoti jati hai

'jigar' kya tab la sakta hai koi dil mein zaKHmon ki

magar kuchh ghaib se tadbir-e-marham hoti jati hai