teri KHatir ye fusun humne jaga rakkha hai

terī ḳhātir ye fusūñ ham ne jagā rakkhā hai

varna ārā.ish-e-afkār meñ kyā rakkhā hai

hai tirā aks hī ā.īna-e-dil kī zīnat

ek tasvīr se album ko sajā rakkhā hai

barg-e-sad-chāk kā parda hai shagufta gul se

qahqahoñ se ka.ī zaḳhmoñ ko chhupā rakkhā hai

ab na bhaTkeñge musāfir na.ī nasloñ ke kabhī

ham ne rāhoñ meñ lahū apnā jalā rakkhā hai

ham se insāñ kī ḳhajālat nahīñ dekhī jaatī

kam-savādoñ kā bharam ham ne ravā rakkhā hai

kis qayāmat kā hai dīdār tirā va.ada-shikan

dil-e-betāb ne ik hashr uThā rakkhā hai

koī mushkil nahīñ pahchān hamārī 'fāriġh'

apnī ḳhushbū kā safar ham ne judā rakkhā hai

teri KHatir ye fusun hum ne jaga rakkha hai

warna aaraish-e-afkar mein kya rakkha hai

hai tera aks hi aaina-e-dil ki zinat

ek taswir se album ko saja rakkha hai

barg-e-sad-chaak ka parda hai shagufta gul se

qahqahon se kai zaKHmon ko chhupa rakkha hai

ab na bhaTkenge musafir nai naslon ke kabhi

hum ne rahon mein lahu apna jala rakkha hai

hum se insan ki KHajalat nahin dekhi jati

kam-sawadon ka bharam hum ne rawa rakkha hai

kis qayamat ka hai didar tera wada-shikan

dil-e-betab ne ek hashr uTha rakkha hai

koi mushkil nahin pahchan hamari 'farigh'

apni KHushbu ka safar hum ne juda rakkha hai