teri nazron mein to abru mein kaman DhunDta hun

tiir nazroñ meñ to abrū meñ kamāñ DhūñDtā huuñ

us kī āñkhoñ meñ ga.ī rut ke nishāñ DhūñDtā huuñ

nashsha-e-qurb se baḌh kar hai tirī khoj mujhe

tū jahāñ mil na sake tujh ko vahāñ DhūñDtā huuñ

taaza vārid huuñ miyāñ aur ye shahr-e-dil hai

kuchh kamāne ko yahāñ kār-e-ziyāñ DhūñDtā huuñ

shak kī be-samt masāfat hī mujhe maar na de

jo yaqīñ mujh ko dilā de vo gumāñ DhūñDtā huuñ

apne andar mujhe karbal kā samāñ lagtā hai

sar-bulandī ke liye nok-e-sināñ DhūñDtā huuñ

asr-e-hāzir bhī lage harf-e-mukarrar 'jāzib'

apne hone ke liye taaza jahāñ DhūñDtā huuñ

tir nazron mein to abru mein kaman DhunDta hun

us ki aankhon mein gai rut ke nishan DhunDta hun

nashsha-e-qurb se baDh kar hai teri khoj mujhe

tu jahan mil na sake tujh ko wahan DhunDta hun

taza warid hun miyan aur ye shahr-e-dil hai

kuchh kamane ko yahan kar-e-ziyan DhunDta hun

shak ki be-samt masafat hi mujhe mar na de

jo yaqin mujh ko dila de wo guman DhunDta hun

apne andar mujhe karbal ka saman lagta hai

sar-bulandi ke liye nok-e-sinan DhunDta hun

asr-e-hazir bhi lage harf-e-mukarrar 'jazib'

apne hone ke liye taza jahan DhunDta hun