teri nigah-e-naz baDi kargar gai

terī nigāh-e-nāz baḌī kārgar ga.ī

mere mazāq-e-dīd ko be-kār kar ga.ī

hogā zarūr pās-e-vafā un ko ek din

bas is ḳhayāl meñ hī javānī guzar ga.ī

apne shikasta-hāl kā mumkin na thā ilaaj

tum ne nazar milā.ī to duniyā sañvar ga.ī

yuuñ kaT ga.ī ḳhayāl meñ un ke shab-e-firāq

ye bhī ḳhabar baneñ kidhar aa.ī kidhar ga.ī

dekhe to koī jazb-e-mohabbat kā ye asar

hir-phir ke mere dil pe hī un kī nazar ga.ī

māmūr hai nigāh meñ ab saarī kā.enāt

tanvīr kis ke husn kī har sū nikhar ga.ī

do-gām bhī chale nahīñ tum rāh-e-ishq meñ

saḳhtī-e-rāh tum ko to bezār kar ga.ī

'anjum' kisī kī chashm-e-karam kā ye faiz hai

tūfān meñ bhī ghir ke jo kashtī ubhar ga.ī

teri nigah-e-naz baDi kargar gai

mere mazaq-e-did ko be-kar kar gai

hoga zarur pas-e-wafa un ko ek din

bas is KHayal mein hi jawani guzar gai

apne shikasta-haal ka mumkin na tha ilaj

tum ne nazar milai to duniya sanwar gai

yun kaT gai KHayal mein un ke shab-e-firaq

ye bhi KHabar banen kidhar aai kidhar gai

dekhe to koi jazb-e-mohabbat ka ye asar

hir-phir ke mere dil pe hi un ki nazar gai

mamur hai nigah mein ab sari kaenat

tanwir kis ke husn ki har su nikhar gai

do-gam bhi chale nahin tum rah-e-ishq mein

saKHti-e-rah tum ko to bezar kar gai

'anjum' kisi ki chashm-e-karam ka ye faiz hai

tufan mein bhi ghir ke jo kashti ubhar gai