teri surat nigahon mein phirti rahe ishq tera satae to main kya karun

terī sūrat nigāhoñ meñ phirtī rahe ishq terā satā.e to maiñ kyā karūñ

koī itnā to aa kar batā de mujhe jab tirī yaad aa.e to maiñ kyā karūñ

maiñ ne ḳhāk-e-nasheman ko bose diye aur ye kah ke bhī dil ko samjhā liyā

āshiyāna banānā mirā kaam thā koī bijlī girā.e to maiñ kyā karūñ

maiñ ne māñgī thī ye masjidoñ meñ duā maiñ jise chāhtā huuñ vo mujh ko mile

jo mirā farz thā maiñ ne puurā kiyā ab ḳhudā hī na chāhe to maiñ kyā karūñ

shauq piine kā mujh ko ziyāda na thā tark-e-tauba kā koī irāda na thā

maiñ sharābī nahīñ mujh ko tohmat na do vo nazar se pilā.e to maiñ kyā karūñ

husn aur ishq donoñ meñ tafrīq hai par inhīñ donoñ pe merā īmān hai

gar ḳhudā ruuTh jaa.e to sajde karūñ aur sanam ruuTh jaa.e to maiñ kyā karūñ

chashm-e-sāqī se piine ko maiñ jo gayā pārsā.ī kā merī bharam khul gayā

ban rahā hai jahāñ meñ tamāshā mirā hosh mujh ko na aa.e to maiñ kyā karūñ

teri surat nigahon mein phirti rahe ishq tera satae to main kya karun

koi itna to aa kar bata de mujhe jab teri yaad aae to main kya karun

main ne KHak-e-nasheman ko bose diye aur ye kah ke bhi dil ko samjha liya

aashiyana banana mera kaam tha koi bijli girae to main kya karun

main ne mangi thi ye masjidon mein dua main jise chahta hun wo mujh ko mile

jo mera farz tha main ne pura kiya ab KHuda hi na chahe to main kya karun

shauq pine ka mujh ko ziyaada na tha tark-e-tauba ka koi irada na tha

main sharabi nahin mujh ko tohmat na do wo nazar se pilae to main kya karun

husn aur ishq donon mein tafriq hai par inhin donon pe mera iman hai

gar KHuda ruTh jae to sajde karun aur sanam ruTh jae to main kya karun

chashm-e-saqi se pine ko main jo gaya parsai ka meri bharam khul gaya

ban raha hai jahan mein tamasha mera hosh mujh ko na aae to main kya karun