teri surat se aashna hun main

terī sūrat se āshnā huuñ maiñ

yuuñ hī pāgal nahīñ huā huuñ maiñ

dam-ba-dam mujh ko āzmāte ho

ek duniyā meñ kyā bachā huuñ maiñ

ajnabī hai vo ḳhūb-rū lekin

lag rahā hai ki jāntā huuñ maiñ

naag Dastā to mar na jaatā maiñ

haa.e is zulf kā Dasā huuñ maiñ

terī duniyā meñ kyoñ rahūñ ab jab

terī mahfil se uTh chukā huuñ maiñ

chhāchh ḳhushiyoñ kī pī nahīñ saktā

ishq ke duudh kā jalā huuñ maiñ

merī fariyād sun nahīñ sakte

aur da.avā hai ki ḳhudā huuñ maiñ

terī dahlīz par qadam roke

jaane kis soch meñ khaḌā huuñ maiñ

dil se nazdīk yaar se 'shāhid'

duur ho kar bhī kab judā huuñ maiñ

teri surat se aashna hun main

yun hi pagal nahin hua hun main

dam-ba-dam mujh ko aazmate ho

ek duniya mein kya bacha hun main

ajnabi hai wo KHub-ru lekin

lag raha hai ki jaanta hun main

nag Dasta to mar na jata main

hae is zulf ka Dasa hun main

teri duniya mein kyon rahun ab jab

teri mahfil se uTh chuka hun main

chhachh KHushiyon ki pi nahin sakta

ishq ke dudh ka jala hun main

meri fariyaad sun nahin sakte

aur dawa hai ki KHuda hun main

teri dahliz par qadam roke

jaane kis soch mein khaDa hun main

dil se nazdik yar se 'shahid'

dur ho kar bhi kab juda hun main