تیری تسکیں کا سبب کون و مکاں ہے کہ نہیں

تیری تسکیں کا سبب کون و مکاں ہے کہ نہیں

روح پرور یہ جہان گزراں ہے کہ نہیں

دن کی ضو تابیاں تاریک فضائیں شب کی

پچھلی راتوں کے دھندلکے سے عیاں ہے کہ نہیں

نعرۂ دار و رسن حادثہ کون و مکاں

خفتہ جانوں کے لئے خواب گراں ہے کہ نہیں

خود خم و پیچ تجھے راہ کے بتلا دیں گے

تیری ٹھوکر میں ترا سود و زیاں ہے کہ نہیں

تیری زلفیں ترا رخ تیری جبیں تیری نظر

یہ چمن آئنۂ دیدہ وراں ہے کہ نہیں

اس نظر سے وہ مجھے دیکھتے رہتے ہیں کلیمؔ

گرم خوں گرم نفس گرم فغاں ہے کہ نہیں