teri ulfat wasul ho jaise

terī ulfat vasūl ho jaise

ne.amatoñ kā nuzūl ho jaise

tū mire āsmāñ kā taara hai

dil tirī rah kī dhuul ho jaise

tere taabe hī chalne lagtā hai

vaqt terā usuul ho jaise

terā dīdār ho rahā hai mujhe

merī mannat qubūl ho jaise

hasratoñ se ulajhtī rahtī huuñ

zindagānī babūl ho jaise

kapkapī sī badan meñ utrī hai

merī hālat malūl ho jaise

is tahayyur se tujh ko suntī huuñ

saarī duniyā fuzūl ho jaise

teri ulfat wasul ho jaise

neamaton ka nuzul ho jaise

tu mere aasman ka tara hai

dil teri rah ki dhul ho jaise

tere tabe hi chalne lagta hai

waqt tera usul ho jaise

tera didar ho raha hai mujhe

meri mannat qubul ho jaise

hasraton se ulajhti rahti hun

zindagani babul ho jaise

kapkapi si badan mein utri hai

meri haalat malul ho jaise

is tahayyur se tujh ko sunti hun

sari duniya fuzul ho jaise