teri yaadon ki chalin purwaiyan

terī yādoñ kī chalīñ purvā.iyāñ

dard ne phir dil meñ liiñ añgḌā.iyāñ

ho mubārak tum ko bazm-ārā.iyāñ

raas ham ko aa ga.iiñ tanhā.iyāñ

ab to ḳhvāboñ meñ bhī tum aate nahīñ

mujh ko Dastī haiñ mirī tanhā.iyāñ

ye sila ham ko vafā kar ke milā

har taraf hone lagīñ rusvā.iyāñ

zaḳhm dil ke phir hare hone lage

yuuñ huiiñ dil meñ chaman-ārā.iyāñ

ġham hī ġham mujh par musallat ho ga.e

jab tire āñgan bajīñ shahnā.iyāñ

un ke va.ade par bharosa kar ke maiñ

sah rahā huuñ hijr kī tanhā.iyāñ

mujh ko mere haal par ab chhoḌ de

dekh liiñ terī karam-farmā.iyāñ

kyoñ kisī ko be-sabab ilzām duuñ

thiiñ muqaddar meñ mire rusvā.iyāñ

āsmāñ se TuuT kar taare gire

liiñ mashiyyat ne ajab añgḌā.iyāñ

jab taḳhayyul meñ mire aate haiñ vo

muskurātī haiñ mirī tanhā.iyāñ

ham ne samjhāyā bahut lekin 'sirāj'

tū na samjhā pyaar kī gahrā.iyāñ

teri yaadon ki chalin purwaiyan

dard ne phir dil mein lin angDaiyan

ho mubarak tum ko bazm-araiyan

ras hum ko aa gain tanhaiyan

ab to KHwabon mein bhi tum aate nahin

mujh ko Dasti hain meri tanhaiyan

ye sila hum ko wafa kar ke mila

har taraf hone lagin ruswaiyan

zaKHm dil ke phir hare hone lage

yun huin dil mein chaman-araiyan

gham hi gham mujh par musallat ho gae

jab tere aangan bajin shahnaiyan

un ke wade par bharosa kar ke main

sah raha hun hijr ki tanhaiyan

mujh ko mere haal par ab chhoD de

dekh lin teri karam-farmaiyan

kyon kisi ko be-sabab ilzam dun

thin muqaddar mein mere ruswaiyan

aasman se TuT kar tare gire

lin mashiyyat ne ajab angDaiyan

jab taKHayyul mein mere aate hain wo

muskuraati hain meri tanhaiyan

hum ne samjhaya bahut lekin 'siraj'

tu na samjha pyar ki gahraiyan