tez ho jaen hawaen to bagula ho jaun

tez ho jaa.eñ havā.eñ to bagūlā ho jā.ūñ

ghūmte ghūmte ham-raqba-e-sahrā ho jā.ūñ

ḳhud-kalāmī mirī aadat nahīñ majbūrī hai

yuuñ na masrūf rahūñ maiñ to akelā ho jā.ūñ

dūsrā paañv uThāne kī zarūrat na paḌe

aur maiñ fāteh-e-nāhīd-o-surayyā ho jā.ūñ

band āñkhoñ se na kar mashq-e-tasavvur din-rāt

ki hamesha ke liye jaan maiñ terā ho jā.ūñ

ye tirī gul-badanī ye tirī kam-pairahanī

sair-chashmī se kahīñ aur na pyāsā ho jā.ūñ

ik sirā hai magar aatā nahīñ hāthoñ meñ 'zubair'

jis bahāne se maiñ be-gāna-e-duniyā ho jā.ūñ

tez ho jaen hawaen to bagula ho jaun

ghumte ghumte ham-raqba-e-sahra ho jaun

KHud-kalami meri aadat nahin majburi hai

yun na masruf rahun main to akela ho jaun

dusra panw uThane ki zarurat na paDe

aur main fateh-e-nahid-o-surayya ho jaun

band aankhon se na kar mashq-e-tasawwur din-raat

ki hamesha ke liye jaan main tera ho jaun

ye teri gul-badani ye teri kam-pairahani

sair-chashmi se kahin aur na pyasa ho jaun

ek sira hai magar aata nahin hathon mein 'zubair'

jis bahane se main be-gana-e-duniya ho jaun