tha ajab seminar ka mausam tabsire ho rahe the har fan par

thā ajab seminar kā mausam tabsire ho rahe the har fan par

shā.erī par sabhī kā qaul thā ye gard kitnī jamī hai darpan par

aaj qistoñ meñ dhuup utrī hai par baḌe karr-o-farr se utrī hai

aaj sūraj hai Dūbne ko magar dhuup ke naqsh-e-pā haiñ āñgan par

aaj bādal phaTe haiñ āñkhoñ meñ aaj sailāb aane vaalā hai

aaj chehre ke koh TūTeñge aur chaTāneñ gireñgī dāman par

kashmakash meñ haiñ tinke chhappar ke ḳhaak ho jaa.eñ yā ThiThurte raheñ

barq hī barq hai fazāoñ meñ os hī os hai nasheman par

aap muslim haiñ aap ke sar par muftī sāhab kā qaul utregā

kufr aur shirk aur bid.at ke fatve aate nahīñ barahman par

ḳhaal jis ne 'navāz' udheḌī hai vo hī darzī hai mere paikar kā

vo hī gin kar batā.egā tum ko kitne paivand haiñ mire tan par

tha ajab seminar ka mausam tabsire ho rahe the har fan par

shaeri par sabhi ka qaul tha ye gard kitni jami hai darpan par

aaj qiston mein dhup utri hai par baDe karr-o-farr se utri hai

aaj suraj hai Dubne ko magar dhup ke naqsh-e-pa hain aangan par

aaj baadal phaTe hain aankhon mein aaj sailab aane wala hai

aaj chehre ke koh TuTenge aur chaTanen girengi daman par

kashmakash mein hain tinke chhappar ke KHak ho jaen ya ThiThurte rahen

barq hi barq hai fazaon mein os hi os hai nasheman par

aap muslim hain aap ke sar par mufti sahab ka qaul utrega

kufr aur shirk aur bidat ke fatwe aate nahin barahman par

KHal jis ne 'nawaz' udheDi hai wo hi darzi hai mere paikar ka

wo hi gin kar bataega tum ko kitne paiwand hain mere tan par