tha koi ya nahin tha jo kuchh tha

thā koī yā nahīñ thā jo kuchh thā

dil ke andar kahīñ thā jo kuchh thā

tū bhī apne se ḳhush-gumāñ thā bahut

maiñ bhī apne ta.iiñ thā jo kuchh thā

shahr-e-ḳhūbāñ meñ vo vafā-dushman

ḳhūbsūrat-tarīñ thā jo kuchh thā

durd-e-mai thī ki talḳhī-e-hastī

jaam meñ tah-nashīñ thā jo kuchh thā

chhoḌ aa.e 'abas dar-e-jānāñ

yaar sab kuchh vahīñ thā jo kuchh thā

'ishq iksīr thā diloñ ke liye

zahr thā añgbīñ thā jo kuchh thā

hosh aayā to ab khulā hai 'farāz'

maiñ to kuchh bhī nahīñ thā jo kuchh thā

tha koi ya nahin tha jo kuchh tha

dil ke andar kahin tha jo kuchh tha

tu bhi apne se KHush-guman tha bahut

main bhi apne tain tha jo kuchh tha

shahr-e-KHuban mein wo wafa-dushman

KHubsurat-tarin tha jo kuchh tha

durd-e-mai thi ki talKHi-e-hasti

jam mein tah-nashin tha jo kuchh tha

chhoD aae 'abas dar-e-jaanan

yar sab kuchh wahin tha jo kuchh tha

'ishq iksir tha dilon ke liye

zahr tha angbin tha jo kuchh tha

hosh aaya to ab khula hai 'faraaz'

main to kuchh bhi nahin tha jo kuchh tha