tha meri jast pe dariya baDi hairani mein

thā mirī jast pe dariyā baḌī hairānī meñ

kyuuñ mirā aks bahut der rahā paanī meñ

shāyad is ḳhaak se ḳhurshīd koī uTThegā

so maiñ rahtā huuñ anāsir kī nigahbānī meñ

pās-e-ādāb ki yaañ der nahīñ lagtī hai

mīr-e-zindāñ ko badalte hue zindānī meñ

un kī āvāz ko ḳhātir meñ na laane vaalo

tum ne dariyāoñ ko dekhā nahīñ tuġhyānī meñ

vo ajab daur-e-mohabbat thā zamāna thā na vaqt

jaise donoñ hoñ kisī ālam-e-lā-fāni meñ

vo bhī tasvīr sā āġhāz-e-mohabbat meñ rahā

maiñ bhī thā ā.īna-ḳhānoñ kī sī hairānī meñ

koī ġham-ḳhvār nazar aa.e to Dar jaatā huuñ

ye bhī aaseb na ho qālab-e-insāni meñ

mere hoñToñ hī pe uḌtī rahī āvāz kī raakh

kaise lau de ye kisī ḳhitt-e-barfānī meñ

terī bastī ko ḳhudā ishq se ābād rakhe

jis ne ābād rakhā hai mujhe vīrānī meñ

tha meri jast pe dariya baDi hairani mein

kyun mera aks bahut der raha pani mein

shayad is KHak se KHurshid koi uTThega

so main rahta hun anasir ki nigahbani mein

pas-e-adab ki yan der nahin lagti hai

mir-e-zindan ko badalte hue zindani mein

un ki aawaz ko KHatir mein na lane walo

tum ne dariyaon ko dekha nahin tughyani mein

wo ajab daur-e-mohabbat tha zamana tha na waqt

jaise donon hon kisi aalam-e-la-fani mein

wo bhi taswir sa aaghaz-e-mohabbat mein raha

main bhi tha aaina-KHanon ki si hairani mein

koi gham-KHwar nazar aae to Dar jata hun

ye bhi aaseb na ho qalab-e-insani mein

mere honTon hi pe uDti rahi aawaz ki rakh

kaise lau de ye kisi KHitt-e-barfani mein

teri basti ko KHuda ishq se aabaad rakhe

jis ne aabaad rakha hai mujhe virani mein