Thaharna bhul gai hain lahu se tar aankhen

Thaharnā bhuul ga.ī haiñ lahū se tar āñkheñ

bhaTaktī rahtī haiñ din raat dar-ba-dar āñkheñ

vajūd merā kahīñ kho na jaa.e bin tere

raheñgī yuuñ hī tire saath umr bhar āñkheñ

tum apnī āñkhoñ ko nazzāra-e-jahāñ baḳhsho

mirī to ghūmtī rahtī haiñ ret par āñkheñ

tilism-ḳhāna-e-hairat hai ek putlī meñ

dikhātī haiñ mujhe kyā kyā ye muḳhtasar āñkheñ

tumhāre va.ade pe aisā yaqīn hai dil ko

kabhī haiñ dar pe kabhī vaqf-e-rahguzar āñkheñ

tirī nazar ke ta.āqub meñ hai nazar merī

tirī nazar hai jidhar haiñ mirī udhar āñkheñ

ye ḳhadd-o-ḳhāl ye gesū ye sūrat-e-zebā

sabhī kā husn hai apnī jagah magar āñkheñ

Thaharna bhul gai hain lahu se tar aankhen

bhaTakti rahti hain din raat dar-ba-dar aankhen

wajud mera kahin kho na jae bin tere

rahengi yun hi tere sath umr bhar aankhen

tum apni aankhon ko nazzara-e-jahan baKHsho

meri to ghumti rahti hain ret par aankhen

tilism-KHana-e-hairat hai ek putli mein

dikhati hain mujhe kya kya ye muKHtasar aankhen

tumhaare wade pe aisa yaqin hai dil ko

kabhi hain dar pe kabhi waqf-e-rahguzar aankhen

teri nazar ke taaqub mein hai nazar meri

teri nazar hai jidhar hain meri udhar aankhen

ye KHadd-o-KHal ye gesu ye surat-e-zeba

sabhi ka husn hai apni jagah magar aankhen