تھے ہم استادہ ترے در پہ ولے بیٹھ گئے

تھے ہم استادہ ترے در پہ ولے بیٹھ گئے

تو نے چاہا تھا کہ ٹالے نہ ٹلے بیٹھ گئے

بزم میں شیخ جی اب ہے کہ ہے یاں عیب نہیں

فرش پر گر نہ ملی جا تو تلے بیٹھ گئے

غیر بد وضع ہیں محفل سے شتاب ان کی اٹھو

پاس ایسوں کے تم اے جان بھلے بیٹھ گئے

گھر سے نکلا نہ تو اور منتظروں نے تیرے

در پہ نالے کیے یاں تک کہ گلے بیٹھ گئے

ناتواں ہم ہوئے یاں تک کہ تری محفل تک

گھر سے آتے ہوئے سو بار چلے بیٹھ گئے

اشک اور آہ کی شدت نہ تھمی گرچہ بقاؔ

گھر کے گھر اس میں ہزاروں کے جلے بیٹھ گئے