thi aarzu uruj par aur ru-ba-ru thi raat

thī aarzū uruuj par aur rū-ba-rū thī raat

koī mire qarīb thā thī aarzū kī raat

anjāne meñ asiir huī thī nazar magar

taskīn dil ko de ga.ī vo muḳhtasar sī raat

jhapkī palak guzar ga.ī chāhe tavīl thī

dil ko panāh de ga.ī āvārgī kī raat

kis ko ḳhabar thī taḌpeñge furqat meñ umr bhar

in lamhoñ ke guzārne ke fikr meñ thī raat

ye tishnagī ye shauq miTegā na umr bhar

ḳhāmosh rah ke kar ga.ī kuchh arz saarī raat

jaadū thā us kī aañkh kā koī junūn thā

āḳhir ye jaane kyā huā hairān sī thī raat

lamhoñ meñ thī simaT ga.ī vo lambī kaalī raat

lagne lagī na.ī na.ī thī raat sī hī raat

'anjum' kahūñ to kyā kahūñ hāl-e-dil-e-hazīñ

kis darja josh bhar ga.ī vo muskurātī raat

thi aarzu uruj par aur ru-ba-ru thi raat

koi mere qarib tha thi aarzu ki raat

anjaane mein asir hui thi nazar magar

taskin dil ko de gai wo muKHtasar si raat

jhapki palak guzar gai chahe tawil thi

dil ko panah de gai aawargi ki raat

kis ko KHabar thi taDpenge furqat mein umr bhar

in lamhon ke guzarne ke fikr mein thi raat

ye tishnagi ye shauq miTega na umr bhar

KHamosh rah ke kar gai kuchh arz sari raat

jadu tha us ki aankh ka koi junun tha

aaKHir ye jaane kya hua hairan si thi raat

lamhon mein thi simaT gai wo lambi kali raat

lagne lagi nai nai thi raat si hi raat

'anjum' kahun to kya kahun haal-e-dil-e-hazin

kis darja josh bhar gai wo muskuraati raat