thi humne pyar mein har baat mani kya karte

thī ham ne pyaar meñ har baat maanī kyā karte

hameñ hī kahte rahe vo divānī kyā karte

kal us ke hijr kī dīvār toḌ dī ham ne

na.e zamāne meñ yādeñ purānī kyā karte

tumhāre saath hī kirdār thā hamārā bhī

jo tum ga.e to ham aage kahānī kyā karte

yūñhī uThā ke buḌhāpe ko sauñp dī ham ne

tumhāre baad bharī ye javānī kyā karte

nigal liyā vo nagīna ba-vaqt-e-ruḳhsatī hī

tumhāre naam kī thī jo nishānī kyā karte

'diyā' ye aañkh to ik ḳhvāb se hī bhar aa.ī

tumhāre naam pe ham zindagānī kyā karte

thi hum ne pyar mein har baat mani kya karte

hamein hi kahte rahe wo diwani kya karte

kal us ke hijr ki diwar toD di hum ne

nae zamane mein yaaden purani kya karte

tumhaare sath hi kirdar tha hamara bhi

jo tum gae to hum aage kahani kya karte

yunhi uTha ke buDhape ko saunp di hum ne

tumhaare baad bhari ye jawani kya karte

nigal liya wo nagina ba-waqt-e-ruKHsati hi

tumhaare nam ki thi jo nishani kya karte

'diya' ye aankh to ek KHwab se hi bhar aai

tumhaare nam pe hum zindagani kya karte