thi to ye ek baat hi par sang-e-mil thi

thī to ye ek baat hī par sañg-e-mīl thī

khone kā ḳhauf use bhī hirāsāñ kiye rahā

bādal bharā-bharāyā na barsā to rañj kyā

is dhuup ke safar ko to āsāñ kiye rahā

ye ek shai alag se rag-e-jāñ pe baar thī

ik lamha-e-firāq pareshāñ kiye rahā

kyā moḌ thā ki zabt kā yaarā nahīñ rahā

hālāñki 'umr bhar dil-e-nādāñ kiye rahā

us ġham ke qarz-dār haiñ tīra-shaboñ meñ bhī

radd-e-vafā kā daaġh farozāñ kiye rahā

kab aap jānte haiñ ki ik dard mustaqil

paimāñ kī shaam shām-e-ġharībāñ kiye rahā

thi to ye ek baat hi par sang-e-mil thi

khone ka KHauf use bhi hirasan kiye raha

baadal bhara-bharaya na barsa to ranj kya

is dhup ke safar ko to aasan kiye raha

ye ek shai alag se rag-e-jaan pe bar thi

ek lamha-e-firaq pareshan kiye raha

kya moD tha ki zabt ka yara nahin raha

haalanki 'umr bhar dil-e-nadan kiye raha

us gham ke qarz-dar hain tira-shabon mein bhi

radd-e-wafa ka dagh farozan kiye raha

kab aap jaante hain ki ek dard mustaqil

paiman ki sham sham-e-ghariban kiye raha