thi uske liye KHwab ki tabir koi hir

thī us ke liye ḳhvāb kī ta.abīr koī hiir

kartī thī na rāñjhe ko jo tasḳhīr koī hiir

hotī hai vo izzat bhī vo beTī bhī hayā bhī

kyuuñ pahne faqat ishq kī zanjīr koī hiir

is darja tumheñ pās-e-zamāna hai bhalā kyuuñ

kyā tum na karoge kabhī ta.amīr koī hiir

ilzām to aatā hai faqat ishq ke sar hī

rāñjhan kī to kartī nahīñ tahqīr koī hiir

tū bhī to kabhī soch mirī zaat ke mehvar

kyā aap hī kartī rahe tadbīr koī hiir

ab kaun sunā.egā 'rabāb' ishq-sahīfa

kartī jo nahīñ ab koī tafsīr koī hiir

thi us ke liye KHwab ki tabir koi hir

karti thi na ranjhe ko jo tasKHir koi hir

hoti hai wo izzat bhi wo beTi bhi haya bhi

kyun pahne faqat ishq ki zanjir koi hir

is darja tumhein pas-e-zamana hai bhala kyun

kya tum na karoge kabhi tamir koi hir

ilzam to aata hai faqat ishq ke sar hi

ranjhan ki to karti nahin tahqir koi hir

tu bhi to kabhi soch meri zat ke mehwar

kya aap hi karti rahe tadbir koi hir

ab kaun sunaega 'rabab' ishq-sahifa

karti jo nahin ab koi tafsir koi hir