thi yaad kis dayar ki jo aa ke yun rula gai

thī yaad kis dayār kī jo aa ke yuuñ rulā ga.ī

bas ek pal meñ jaise zindagī bhī Dagmagā ga.ī

gumāñ thā ye ki dab ga.iiñ vo hasratoñ kī bijliyāñ

ye kaun sī na.ī chamak bujhe diye jalā ga.ī

girā.īñ shāḳh shāḳh se ḳhizāñ ne phuul pattiyāñ

uḌe jo biij har taraf to phir bahār aa ga.ī

khulā nigāh-e-yār kā jo mai-kada to yuuñ lagā

ki pyaas ek umar kī bas ik nazar bujhā ga.ī

ḳhudā-qasam maiñ bach gayā ḳhatā kī tez dhaar se

junūñ kī ik adā thī jo mujhe yuuñ aazmā ga.ī

ye kyā huā ki ab tujhī se bad-gumāñ maiñ ho gayā

maiñ sochtā thā zindagī tū mujh ko raas aa ga.ī

milī hai 'āzim'-e-suḳhan ye kaisī tīrgī tujhe

tire ḳhayāl meñ jo itnī raushnī baḌhā ga.ī

thi yaad kis dayar ki jo aa ke yun rula gai

bas ek pal mein jaise zindagi bhi Dagmaga gai

guman tha ye ki dab gain wo hasraton ki bijliyan

ye kaun si nai chamak bujhe diye jala gai

girain shaKH shaKH se KHizan ne phul pattiyan

uDe jo bij har taraf to phir bahaar aa gai

khula nigah-e-yar ka jo mai-kada to yun laga

ki pyas ek umar ki bas ek nazar bujha gai

KHuda-qasam main bach gaya KHata ki tez dhaar se

junun ki ek ada thi jo mujhe yun aazma gai

ye kya hua ki ab tujhi se bad-guman main ho gaya

main sochta tha zindagi tu mujh ko ras aa gai

mili hai 'azim'-e-suKHan ye kaisi tirgi tujhe

tere KHayal mein jo itni raushni baDha gai