ThiThak gaya mah-e-nau jhil mein utarte hue

ThiThak gayā mah-e-nau jhiil meñ utarte hue

to ham ne dekhā hai āb-e-ravāñ Thaharte hue

qasīda-goī ḳhad-o-ḳhāl kī nazāre kareñ

vo aa.ine se kare guftugū sañvarte hue

na ird-gird kā kuchh hosh thā na ḳhud apnā

ajiib haal thā ḳhushbū se baat karte hue

phir is ke baad simaTne kī aarzū na rahī

kuchh aisā lutf milā TūTte bikharte hue

maiñ apnā haal chhupāne meñ kāmyāb rahā

na dekh paayā vo āñkhoñ meñ ashk bharte hue

zamīñ pe jis kī koī qadr thī na izzat thī

milā thā vādī-e-aflāk se guzarte hue

zabāñ se kuchh na kahā muskurā ke dekh liyā

'mujīb' se jo kiyā ik savāl Darte hue

ThiThak gaya mah-e-nau jhil mein utarte hue

to hum ne dekha hai aab-e-rawan Thaharte hue

qasida-goi KHad-o-KHal ki nazare karen

wo aaine se kare guftugu sanwarte hue

na ird-gird ka kuchh hosh tha na KHud apna

ajib haal tha KHushbu se baat karte hue

phir is ke baad simaTne ki aarzu na rahi

kuchh aisa lutf mila TuTte bikharte hue

main apna haal chhupane mein kaamyab raha

na dekh paya wo aankhon mein ashk bharte hue

zamin pe jis ki koi qadr thi na izzat thi

mila tha wadi-e-aflak se guzarte hue

zaban se kuchh na kaha muskura ke dekh liya

'mujib' se jo kiya ek sawal Darte hue