تھوڑا بہت ملا تو لگا غم عجیب ہے

تھوڑا بہت ملا تو لگا غم عجیب ہے

ملتا رہا تو کہہ دیا ہمدم عجیب ہے

میں ہی سنوں گا یا اسے سن پائے گا خدا

جو شور میرے اندروں پیہم عجیب ہے

مجھ میں بنا چکے ہیں کئی رفتگاں مکان

وہ گھر جو اور گھر سے تو اک دم عجیب ہے

والد ہمارے دوست کے یہ کہہ رہے تھے آج

بیٹا ہمارا جونؔ سے کچھ کم عجیب ہے

چارہ گری بھی کر رہی اب مسئلے کھڑے

ناسور زخم ہو گئے مرہم عجیب ہے

پہلے ہی کھو چکا ہوں میں اپنے عزیز تر

اس پر یہ کائنات بھی برہم عجیب ہے

میں دب رہا ہوں عشق میں احساں تلے ترے

مجھ پر جو گر رہی ہے وہ شبنم عجیب ہے