Thokaren khilwain kya-kya pa-e-be-zanjir ne

Thokareñ khilvā.īñ kyā-kyā pā-e-be-zanjīr ne

gardish-e-taqdīr ne jaulāni-e-tadbīr ne

ālam-e-asbāb se kyā faiz-e-nākāmī milā

raah par lā kar mujhe bhaTkā diyā taqdīr ne

kārvāñ kitne bagūle ban ke ġhā.eb ho ga.e

ḳhaak se yaksāñ kiyā jaulāñ-e-gah-e-tadbīr ne

baaz aa.e zindagī ke ḳhvāb-e-rañgā-rañg se

dast o pā gum kar diye andesha-e-tābīr ne

dād-ḳhvāhī ko uThā hai zarra-e-pāmāl tak

sote fitnoñ ko jagāyā hashr-e-ālam-gīr ne

mātam-e-hasrat kiyā pahle garebāñ phaaḌ kar

phir duā dī dushmanoñ ko dast-e-be-shamshīr ne

jaan de kar ek hukm-e-āḳhirī maanā to kyā

likh diyā jab sarkashoñ meñ kātib-e-taqdīr ne

vaah kyā kahnā mujassam kar diyā mauhūm ko

naqsh-bandān-e-azal kī shoḳhi-e-tahrīr ne

jam ga.ī gard-e-fanā aisī ki chhuTne kī nahīñ

kis ġhazab kā rañg pakḌā 'yās' kī tasvīr ne

Thokaren khilwain kya-kya pa-e-be-zanjir ne

gardish-e-taqdir ne jaulani-e-tadbir ne

aalam-e-asbab se kya faiz-e-nakaami mila

rah par la kar mujhe bhaTka diya taqdir ne

karwan kitne bagule ban ke ghaeb ho gae

KHak se yaksan kiya jaulan-e-gah-e-tadbir ne

baz aae zindagi ke KHwab-e-ranga-rang se

dast o pa gum kar diye andesha-e-tabir ne

dad-KHwahi ko uTha hai zarra-e-pamal tak

sote fitnon ko jagaya hashr-e-alam-gir ne

matam-e-hasrat kiya pahle gareban phaD kar

phir dua di dushmanon ko dast-e-be-shamshir ne

jaan de kar ek hukm-e-aKHiri mana to kya

likh diya jab sarkashon mein katib-e-taqdir ne

wah kya kahna mujassam kar diya mauhum ko

naqsh-bandan-e-azal ki shoKHi-e-tahrir ne

jam gai gard-e-fana aisi ki chhuTne ki nahin

kis ghazab ka rang pakDa 'yas' ki taswir ne