tiflan-e-kucha-gard ke patthar bhi kuchh nahin

tiflān-e-kūcha-gard ke patthar bhī kuchh nahīñ

saudā bhī ek vahm hai aur sar bhī kuchh nahīñ

maiñ aur ḳhud ko tujh se chhupā.ūñgā ya.anī maiñ

le dekh le miyāñ mire andar bhī kuchh nahīñ

bas ik gubār-e-vahm hai ik kūcha-gard kā

dīvār-e-būd kuchh nahīñ aur dar bhī kuchh nahīñ

ye shahr-dār-o-muhtasib-o-maulavī hī kyā

pīr-e-muġhān-o-rind-o-qalandar bhī kuchh nahīñ

shaiḳh-e-harām-luqma kī parvā hai kyuuñ tumheñ

masjid bhī us kī kuchh nahīñ mimbar bhī kuchh nahīñ

maqdūr apnā kuchh bhī nahīñ is dayār meñ

shāyad vo jabr hai ki muqaddar bhī kuchh nahīñ

jaanī maiñ tere nāf-piyāle pe huuñ fidā

ye aur baat hai tirā paikar bhī kuchh nahīñ

ye shab kā raqs-o-rañg to kyā sun mirī kuhan

sub.h-e-shitāb-kosh ko daftar bhī kuchh nahīñ

bas ik ġhubār tūr-e-gumāñ kā hai tah-ba-tah

ya.anī nazar bhī kuchh nahīñ manzar bhī kuchh nahīñ

hai ab to ek jaal sukūn-e-hameshgī

parvāz kā to zikr hī kyā par bhī kuchh nahīñ

kitnā Darāvnā hai ye shahr-e-nabūd-o-būd

aisā Darāvnā ki yahāñ Dar bhī kuchh nahīñ

pahlū meñ hai jo mere kahīñ aur hai vo shaḳhs

ya.anī vafā-e-ahd kā bistar bhī kuchh nahīñ

nisbat meñ un kī jo hai aziyyat vo hai magar

shah-rag bhī koī shai nahīñ aur sar bhī kuchh nahīñ

yārāñ tumheñ jo mujh se gila hai to kis liye

mujh ko to e'tirāz ḳhudā par bhī kuchh nahīñ

guzregī 'jaun' shahr meñ rishtoñ ke kis tarah

dil meñ bhī kuchh nahīñ hai zabāñ par bhī kuchh nahīñ

tiflan-e-kucha-gard ke patthar bhi kuchh nahin

sauda bhi ek wahm hai aur sar bhi kuchh nahin

main aur KHud ko tujh se chhupaunga yani main

le dekh le miyan mere andar bhi kuchh nahin

bas ek gubar-e-wahm hai ek kucha-gard ka

diwar-e-bud kuchh nahin aur dar bhi kuchh nahin

ye shahr-dar-o-muhtasib-o-maulawi hi kya

pir-e-mughan-o-rind-o-qalandar bhi kuchh nahin

shaiKH-e-haram-luqma ki parwa hai kyun tumhein

masjid bhi us ki kuchh nahin mimbar bhi kuchh nahin

maqdur apna kuchh bhi nahin is dayar mein

shayad wo jabr hai ki muqaddar bhi kuchh nahin

jaani main tere naf-piyale pe hun fida

ye aur baat hai tera paikar bhi kuchh nahin

ye shab ka raqs-o-rang to kya sun meri kuhan

subh-e-shitab-kosh ko daftar bhi kuchh nahin

bas ek ghubar tur-e-guman ka hai tah-ba-tah

yani nazar bhi kuchh nahin manzar bhi kuchh nahin

hai ab to ek jal sukun-e-hameshgi

parwaz ka to zikr hi kya par bhi kuchh nahin

kitna Darawna hai ye shahr-e-nabud-o-bud

aisa Darawna ki yahan Dar bhi kuchh nahin

pahlu mein hai jo mere kahin aur hai wo shaKHs

yani wafa-e-ahd ka bistar bhi kuchh nahin

nisbat mein un ki jo hai aziyyat wo hai magar

shah-rag bhi koi shai nahin aur sar bhi kuchh nahin

yaran tumhein jo mujh se gila hai to kis liye

mujh ko to e'tiraaz KHuda par bhi kuchh nahin

guzregi 'jaun' shahr mein rishton ke kis tarah

dil mein bhi kuchh nahin hai zaban par bhi kuchh nahin