tir-e-qatil ka ye ehsan rah gaya

tīr-e-qātil kā ye ehsāñ rah gayā

jā-e-dil siina meñ paikāñ rah gayā

kī zarā dast-e-junūñ ne kotahī

chaak aa kar tā-ba-dāmāñ rah gayā

do qadam chal kar tire vahshī ke saath

jāda-e-rāh-e-bayābāñ rah gayā

qatl ho kar bhī subukdoshī kahāñ

teġh kā gardan pe ehsāñ rah gayā

ham to pahuñche bazm-e-jānāñ tak magar

shikva-e-bedād-e-darbāñ rah gayā

kyā qayāmat hai ki kū-e-yār se

ham to nikle aur armāñ rah gayā

dūsroñ par kyā khule rāz-e-dahan

jabki ḳhud saan.e se pinhāñ rah gayā

jazba-e-dil kā zarā dekho asar

tiir niklā bhī to paikāñ rah gayā

jāma-e-hastī bhī ab tan par nahīñ

dekh vahshī terā uryāñ rah gayā

zo.af marne bhī nahīñ detā mujhe

maiñ ajal se bhī to pinhāñ rah gayā

ai junūñ tujh se samajh lūñgā agar

ek bhī tār-e-garebāñ rah gayā

husn chamkā yaar kā ab āftāb

ik charāġh-e-zer-e-dāmāñ rah gayā

log pahuñche manzil-e-maqsūd tak

maiñ jaras kī tarah nālāñ rah gayā

yaad rakhnā dosto is bazm meñ

aa ke 'shiblī' bhī ġhazal-ḳhvāñ rah gayā

tir-e-qatil ka ye ehsan rah gaya

ja-e-dil sina mein paikan rah gaya

ki zara dast-e-junun ne kotahi

chaak aa kar ta-ba-daman rah gaya

do qadam chal kar tere wahshi ke sath

jada-e-rah-e-bayaban rah gaya

qatl ho kar bhi subukdoshi kahan

tegh ka gardan pe ehsan rah gaya

hum to pahunche bazm-e-jaanan tak magar

shikwa-e-bedad-e-darban rah gaya

kya qayamat hai ki ku-e-yar se

hum to nikle aur arman rah gaya

dusron par kya khule raaz-e-dahan

jabki KHud sane se pinhan rah gaya

jazba-e-dil ka zara dekho asar

tir nikla bhi to paikan rah gaya

jama-e-hasti bhi ab tan par nahin

dekh wahshi tera uryan rah gaya

zoaf marne bhi nahin deta mujhe

main ajal se bhi to pinhan rah gaya

ai junun tujh se samajh lunga agar

ek bhi tar-e-gareban rah gaya

husn chamka yar ka ab aaftab

ek charagh-e-zer-e-daman rah gaya

log pahunche manzil-e-maqsud tak

main jaras ki tarah nalan rah gaya

yaad rakhna dosto is bazm mein

aa ke 'shibli' bhi ghazal-KHwan rah gaya