tirgi nam hai dil walon ke uTh jaane ka

tīrgī naam hai dil vāloñ ke uTh jaane kā

jis ko shab kahte haiñ maqtal hai vo parvāne kā

chal bayābāñ kī taraf jī nahīñ ghabrāne kā

rūh-e-majnūñ se ghar ābād hai vīrāne kā

dīda-e-dost tirī chasm-numā.ī kī qasam

maiñ to samjhā thā ki dar khul gayā maiḳhāne kā

dam-e-āḳhir kī mulāqāt meñ kyā tum se kahūñ

vaqt hī tañg bahut hijr ke afsāne kā

dāman-e-sham.a pe dhabbā na rahā vaah re ishq

ḳhuun ab tak nazar aayā nahīñ parvāne kā

tañg hai sehn-e-jahāñ saath na le bār-e-amal

rāsta miltā hai mushkil se guzar jaane kā

gul-o-āhū chaman-o-dasht meñ kah jaate haiñ kuchh

kahīñ mauqa nahīñ ai dil tire bahlāne kā

roke jaate haiñ rah-e-dost ke chalne vaale

vahī dushman hai jo hamdard hai dīvāne kā

qabr vaale mue mamnūn-e-ziyārat lekin

naam badnām kiyā aap ne vīrāne kā

hijr ne kaun sā paivand lagā rakkhā thā

rāsta mil gayā ḳhanjar ko guzar jaane kā

to shab-e-ġham ko na samjhā ho to maiñ samjhā duuñ

vahī maidān-e-shahādat tire parvāne kā

qissa-e-bāġh hai aur merī masarrat kī umiid

Dhañg aatā nahīñ sayyād ko bahlāne kā

bazm-e-rañgīñ meñ tirī zikr-e-ġham aayā to sahī

ḳhush rahe chheḌne vaalā mire afsāne kā

āshiyāñ ābla-e-bāġh hai ai soḳhta-dil

ik nishāñ chhoḌ chalā huuñ tire jal jaane kā

ibrat-e-aql hai vāraftagī-e-ahl-e-mazāq

hosh vāloñ meñ hai charchā tire dīvāne kā

hasb-e-farmā.ish-e-gardish haiñ ġharīboñ ke mazār

āsmāñ dost hai manzar mire vīrāne kā

hissa-e-baḳht kā maane hai yahī daur-e-falak

baḌh gayā ghuum ke rasta mire paimāne kā

ho gayā ġharq sar-e-sho.ala-e-sham-e-mahfil

ḳhuun ūñchā huā utnā kisī parvāne kā

naza.a ke vaqt jo kahtā huuñ vo samjhe ki nahīñ

bāb-e-avval to yahīñ ḳhatm hai afsāne kā

le pareshānī-e-dil ab hai tirī umr darāz

vaqt khiñchne lagā zulfoñ ke sañvar jaane kā

choT khāne se dabī aag ubhar aa.ī hai

rañg badlā hai mire dil ne sanam-ḳhāne kā

dāġh-e-dil qabr kī zulmat meñ hai be-nūr aisā

jaise dekhā ho charāġh aap ne vīrāne kā

husn aur ishq ke nairañg ḳhudā hī jaane

sham.a jaltī hai ki dil jaltā hai parvāne kā

dekh ḳhūn-e-sar-e-farhād kā rañgīñ patthar

ye nagīna hai banāyā huā dīvāne kā

naza.a ik iid hai rote hue vo aa.e haiñ

ai dil-e-zār yahī vaqt hai mar jaane kā

ahl-e-dil jāgte-sote meñ sunā karte haiñ

vaqt koī nahīñ 'sāqib' mire afsāne kā

tirgi nam hai dil walon ke uTh jaane ka

jis ko shab kahte hain maqtal hai wo parwane ka

chal bayaban ki taraf ji nahin ghabrane ka

ruh-e-majnun se ghar aabaad hai virane ka

dida-e-dost teri chasm-numai ki qasam

main to samjha tha ki dar khul gaya maiKHane ka

dam-e-aKHir ki mulaqat mein kya tum se kahun

waqt hi tang bahut hijr ke afsane ka

daman-e-shama pe dhabba na raha wah re ishq

KHun ab tak nazar aaya nahin parwane ka

tang hai sehn-e-jahan sath na le bar-e-amal

rasta milta hai mushkil se guzar jaane ka

gul-o-ahu chaman-o-dasht mein kah jate hain kuchh

kahin mauqa nahin ai dil tere bahlane ka

roke jate hain rah-e-dost ke chalne wale

wahi dushman hai jo hamdard hai diwane ka

qabr wale mue mamnun-e-ziyarat lekin

nam badnam kiya aap ne virane ka

hijr ne kaun sa paiwand laga rakkha tha

rasta mil gaya KHanjar ko guzar jaane ka

to shab-e-gham ko na samjha ho to main samjha dun

wahi maidan-e-shahadat tere parwane ka

qissa-e-bagh hai aur meri masarrat ki umid

Dhang aata nahin sayyaad ko bahlane ka

bazm-e-rangin mein teri zikr-e-gham aaya to sahi

KHush rahe chheDne wala mere afsane ka

aashiyan aabla-e-bagh hai ai soKHta-dil

ek nishan chhoD chala hun tere jal jaane ka

ibrat-e-aql hai waraftagi-e-ahl-e-mazaq

hosh walon mein hai charcha tere diwane ka

hasb-e-farmaish-e-gardish hain gharibon ke mazar

aasman dost hai manzar mere virane ka

hissa-e-baKHt ka mane hai yahi daur-e-falak

baDh gaya ghum ke rasta mere paimane ka

ho gaya gharq sar-e-shoala-e-sham-e-mahfil

KHun uncha hua utna kisi parwane ka

naza ke waqt jo kahta hun wo samjhe ki nahin

bab-e-awwal to yahin KHatm hai afsane ka

le pareshani-e-dil ab hai teri umr daraaz

waqt khinchne laga zulfon ke sanwar jaane ka

choT khane se dabi aag ubhar aai hai

rang badla hai mere dil ne sanam-KHane ka

dagh-e-dil qabr ki zulmat mein hai be-nur aisa

jaise dekha ho charagh aap ne virane ka

husn aur ishq ke nairang KHuda hi jaane

shama jalti hai ki dil jalta hai parwane ka

dekh KHun-e-sar-e-farhad ka rangin patthar

ye nagina hai banaya hua diwane ka

naza ek id hai rote hue wo aae hain

ai dil-e-zar yahi waqt hai mar jaane ka

ahl-e-dil jagte-sote mein suna karte hain

waqt koi nahin 'saqib' mere afsane ka