tis din ke liye tark-e-mai-o-saqi kar lun

tiis din ke liye tark-e-mai-o-sāqī kar luuñ

vā.iz-e-sāda ko rozoñ meñ to raazī kar luuñ

pheñk dene kī koī chiiz nahīñ fazl-o-kamāl

varna hāsid tirī ḳhātir se maiñ ye bhī kar luuñ

ai nakīrain qayāmat hī pe rakkho pursish

maiñ zarā umr-e-guzishta kī talāfī kar luuñ

kuchh to ho chāra-e-ġham baat to yak ho jaa.e

tum ḳhafā ho to ajal hī ko maiñ raazī kar luuñ

aur phir kis ko pasand aa.egā vīrāna-e-dil

ġham se maanā bhī ki is ghar ko maiñ ḳhālī kar luuñ

jaur-e-gardūñ se jo marne kī bhī fursat mil jaa.e

imtihān-e-dam-e-jāñ-parvar-e-īsī kar luuñ

dil hī miltā nahīñ sifloñ se vagarna 'shiblī'

ḳhuub guzre falak-e-dūñ se jo yaarī kar luuñ

tis din ke liye tark-e-mai-o-saqi kar lun

waiz-e-sada ko rozon mein to raazi kar lun

phenk dene ki koi chiz nahin fazl-o-kamal

warna hasid teri KHatir se main ye bhi kar lun

ai nakirain qayamat hi pe rakkho pursish

main zara umr-e-guzishta ki talafi kar lun

kuchh to ho chaara-e-gham baat to yak ho jae

tum KHafa ho to ajal hi ko main raazi kar lun

aur phir kis ko pasand aaega virana-e-dil

gham se mana bhi ki is ghar ko main KHali kar lun

jaur-e-gardun se jo marne ki bhi fursat mil jae

imtihan-e-dam-e-jaan-parwar-e-isi kar lun

dil hi milta nahin siflon se wagarna 'shibli'

KHub guzre falak-e-dun se jo yari kar lun