tilism-e-dosh-o-farda se rihai chahta hun

tilism-e-dosh-o-fardā se rihā.ī chāhtā huuñ

maiñ shahr-e-ḳhvāb kī farmāñ-ravā.ī chāhtā huuñ

alag ho kar zarā sī der ko fikr-e-jahāñ se

maiñ apne aap se kuchh āshnā.ī chāhtā huuñ

girā dūñgā maiñ har dīvār apne rāste kī

ki maiñ darbār-e-shāhī tak rasā.ī chāhtā huuñ

ta'alluq toḌnā hogā mujhe āb-e-ravāñ se

agar maiñ aa.ine se kaj-adā.ī chāhtā huuñ

kabhī hai tark-e-duniyā par bahut isrār mujh ko

kabhī maiñ apne hisse kī ḳhudā.ī chāhtā huuñ

huī hai mehrbāñ mujh par mirī taqdīr 'sājid'

magar maiñ saarī duniyā kī bhalā.ī chāhtā huuñ

tilism-e-dosh-o-farda se rihai chahta hun

main shahr-e-KHwab ki farman-rawai chahta hun

alag ho kar zara si der ko fikr-e-jahan se

main apne aap se kuchh aashnai chahta hun

gira dunga main har diwar apne raste ki

ki main darbar-e-shahi tak rasai chahta hun

ta'alluq toDna hoga mujhe aab-e-rawan se

agar main aaine se kaj-adai chahta hun

kabhi hai tark-e-duniya par bahut israr mujh ko

kabhi main apne hisse ki KHudai chahta hun

hui hai mehrban mujh par meri taqdir 'sajid'

magar main sari duniya ki bhalai chahta hun