tilism-e-kar-e-jahan ka asar tamam hua

tilism-e-kār-e-jahāñ kā asar tamām huā

ki ḳhaak baiTh ga.ī ab safar tamām huā

bas ik sukūt bikhartā huā hai chāroñ taraf

har ek ma.arka-e-ḳhair-o-shar tamām huā

kahīñ sakūñ na milā ishq se farār ke ba.ad

kisī tarah na mirā dard-e-sar tamām huā

gharoñ meñ Dhaltī huī raat thak ke baiTh ga.ī

ki ab fasāna-e-dīvār-o-dar tamām huā

sab apnī apnī ḳhabar le rahe haiñ vaqt-e-zavāl

diloñ se be-ḳhabarī kā asar tamām huā

phir us ke rū-ba-rū ham dil kī baat kah na sake

hamārā hausla bār-e-digar tamām huā

har ek dāstāñ tujh se shurūa hotī hai

har ek qissa tire naam par tamām huā

na koī baat mukammal huī mirī 'aḳhtar'

na koī kaam mirā sar-ba-sar tamām huā

tilism-e-kar-e-jahan ka asar tamam hua

ki KHak baiTh gai ab safar tamam hua

bas ek sukut bikharta hua hai chaaron taraf

har ek marka-e-KHair-o-shar tamam hua

kahin sakun na mila ishq se farar ke baad

kisi tarah na mera dard-e-sar tamam hua

gharon mein Dhalti hui raat thak ke baiTh gai

ki ab fasana-e-diwar-o-dar tamam hua

sab apni apni KHabar le rahe hain waqt-e-zawal

dilon se be-KHabari ka asar tamam hua

phir us ke ru-ba-ru hum dil ki baat kah na sake

hamara hausla bar-e-digar tamam hua

har ek dastan tujh se shurua hoti hai

har ek qissa tere nam par tamam hua

na koi baat mukammal hui meri 'aKHtar'

na koi kaam mera sar-ba-sar tamam hua