tinke ka hath aaya sahaara ghalat ghalat

tinke kā haath aayā sahārā ġhalat ġhalat

mauj-e-talab ne paayā kinārā ġhalat ġhalat

sail-e-balā meñ Duub rahā thā maiñ jis ghaḌī

duniyā ke saath us ne pukārā ġhalat ġhalat

ham log jī rahe haiñ tire shahr meñ abhī

kiije na indirāj hamārā ġhalat ġhalat

chaltā hai dushmanoñ kī tarah mere saath jo

us ne kiyā hai mujh ko gavārā ġhalat ġhalat

koī bhī chiiz rahnī nahīñ tā-abad yahāñ

naqsha hai is jahān kā saarā ġhalat ġhalat

shāḳh-e-talab ko paanī diyā hai lahū nahīñ

ham ne har ek gul ko nikhārā ġhalat ġhalat

rātoñ kā iztirāb nahīñ yuuñ bhī jā sakā

ubhrā hai zulmatoñ meñ sitāra ġhalat ġhalat

ik ik varaq meñ ḳhauf kā mazmūn hai miyāñ

hai ziist kā har ek shumāra ġhalat ġhalat

dhokā diyā hai aa.ine ko us ne is tarah

zulfoñ ko us ne ruḳh pe sañvārā ġhalat ġhalat

ilzām de ke dāna-e-gandum kā ai 'nabīl'

us ne mujhe zamīñ pe utārā ġhalat ġhalat

tinke ka hath aaya sahaara ghalat ghalat

mauj-e-talab ne paya kinara ghalat ghalat

sail-e-bala mein Dub raha tha main jis ghaDi

duniya ke sath us ne pukara ghalat ghalat

hum log ji rahe hain tere shahr mein abhi

kije na indiraj hamara ghalat ghalat

chalta hai dushmanon ki tarah mere sath jo

us ne kiya hai mujh ko gawara ghalat ghalat

koi bhi chiz rahni nahin ta-abad yahan

naqsha hai is jahan ka sara ghalat ghalat

shaKH-e-talab ko pani diya hai lahu nahin

hum ne har ek gul ko nikhaara ghalat ghalat

raaton ka iztirab nahin yun bhi ja saka

ubhra hai zulmaton mein sitara ghalat ghalat

ek ek waraq mein KHauf ka mazmun hai miyan

hai zist ka har ek shumara ghalat ghalat

dhoka diya hai aaine ko us ne is tarah

zulfon ko us ne ruKH pe sanwara ghalat ghalat

ilzam de ke dana-e-gandum ka ai 'nabil'

us ne mujhe zamin pe utara ghalat ghalat