tera aasman nawakon ka KHazina hayat-afrina hayat-afrina

tirā āsmāñ nāvakoñ kā ḳhazīna hayāt-āfrīnā hayāt-āfrīnā

hamārī zamīñ la.al-o-gul kā dafīna hayāt-āfrīnā hayāt-āfrīnā

hue naam aur nañg sab ġharq-e-sahbā mirī mai-gusārī kī hogī sazā kyā

tire naam kā ek jur.a yahī nā hayāt-āfrīnā hayāt-āfrīnā

tire va.ada-e-rizq kī hai duhā.ī agar rizq āzūqa-e-rūh bhī hai

to ham to haiñ mahrūm-e-nān-e-shabīna hayāt-āfrīnā hayāt-āfrīnā

na sāñsoñ meñ josh-e-numū kā talātum na marne ke ġham meñ gudāz-e-ta.allum

ye jiinā bhī hai koī jiine meñ jiinā hayāt-āfrīnā hayāt-āfrīnā

zamīñ kā kaleja bahut phuñk rahā hai falak phaT paḌe qulzum-e-ḳhūñ ravāñ ho

jabīn-e-mashiyyat se Tapke pasīna hayāt-āfrīnā hayāt-āfrīnā

mah-o-mehr-o-anjum falak ke dulāre tirī mumlikat ke hasīñ shāhzāde

hamārī zamīñ kā.enātī hasīna hayāt-āfrīnā hayāt-āfrīnā

nahīñ 'aḳhtar'-e-zār māyūs ḳhud se ki zulmat bhī chhaTtī hai darja-ba-darja

utartī hai rahmat bhī zīna-ba-zīna hayāt-āfrīnā hayāt-āfrīnā

tera aasman nawakon ka KHazina hayat-afrina hayat-afrina

hamari zamin lal-o-gul ka dafina hayat-afrina hayat-afrina

hue nam aur nang sab gharq-e-sahba meri mai-gusari ki hogi saza kya

tere nam ka ek jura yahi na hayat-afrina hayat-afrina

tere wada-e-rizq ki hai duhai agar rizq aazuqa-e-ruh bhi hai

to hum to hain mahrum-e-nan-e-shabina hayat-afrina hayat-afrina

na sanson mein josh-e-numu ka talatum na marne ke gham mein gudaz-e-tallum

ye jina bhi hai koi jine mein jina hayat-afrina hayat-afrina

zamin ka kaleja bahut phunk raha hai falak phaT paDe qulzum-e-KHun rawan ho

jabin-e-mashiyyat se Tapke pasina hayat-afrina hayat-afrina

mah-o-mehr-o-anjum falak ke dulare teri mumlikat ke hasin shahzade

hamari zamin kaenati hasina hayat-afrina hayat-afrina

nahin 'aKHtar'-e-zar mayus KHud se ki zulmat bhi chhaTti hai darja-ba-darja

utarti hai rahmat bhi zina-ba-zina hayat-afrina hayat-afrina