tera KHayal hai ab chashm-e-tar ka zawiya dekh

tirā ḳhayāl hai ab chashm-e-tar kā zāviya dekh

tire baġhair bhī zinda huuñ merā hausla dekh

idhar sitam kī havā hausloñ ke diip udhar

mayān-e-bātil-o-haq hai bapā jo ma.arka dekh

diloñ ke khel meñ rusvā.ī bhī hai ġham bhī haiñ

ye pahle soch le phir kar koī muāhida dekh

dil-o-nigāh meñ rakh sirf manzil-e-maqsūd

kiyā hai azm safar kā to phir na fāsla dekh

tujhe kahā thā ki itnī na Dhiil de dil ko

so ab rukegā kahāñ ḳhvāhishoñ kā qāfila dekh

abhī hai vaqt yahīñ saath chhoḌ de merā

bahut kaThin hai mirī jaañ vafā kā rāsta dekh

vo dekh sāmne raushan charāġh-e-manzil hai

hai 'zebī' azm safar kā to phir na fāsla dekh

tera KHayal hai ab chashm-e-tar ka zawiya dekh

tere baghair bhi zinda hun mera hausla dekh

idhar sitam ki hawa hauslon ke dip udhar

mayan-e-baatil-o-haq hai bapa jo marka dekh

dilon ke khel mein ruswai bhi hai gham bhi hain

ye pahle soch le phir kar koi muahida dekh

dil-o-nigah mein rakh sirf manzil-e-maqsud

kiya hai azm safar ka to phir na fasla dekh

tujhe kaha tha ki itni na Dhil de dil ko

so ab rukega kahan KHwahishon ka qafila dekh

abhi hai waqt yahin sath chhoD de mera

bahut kaThin hai meri jaan wafa ka rasta dekh

wo dekh samne raushan charagh-e-manzil hai

hai 'zebi' azm safar ka to phir na fasla dekh