tera qurb tha ki firaq tha wahi teri jalwagari rahi

tirā qurb thā ki firāq thā vahī terī jalvagarī rahī

ki jo raushnī tire jism kī thī mire badan meñ bharī rahī

tire shahr meñ maiñ chalā thā jab to koī bhī saath na thā mire

to maiñ kis se mahv-e-kalām thā to ye kis kī ham-safarī rahī

mujhe apne aap pe maan thā ki na jab talak tirā dhyān thā

tū misāl thī mirī āgahī tū kamāl-e-be-ḳhabarī rahī

mire āshnā bhī ajiib the na rafīq the na raqīb the

mujhe jaañ se dard aziiz thā unheñ fikr-e-chāragarī rahī

maiñ ye jāntā thā mirā hunar hai shikast-o-reḳht se mo'tabar

jahāñ log sañg-ba-dast the vahīñ merī shīshagarī rahī

jahāñ nāsehoñ kā hujūm thā vahīñ āshiqoñ kī bhī dhuum thī

jahāñ baḳhiya-gar the galī galī vahīñ rasm-e-jāma-darī rahī

tire paas aa ke bhī jaane kyuuñ mirī tishnagī meñ hirās thā

ba-misāl-e-chashm-e-ġhazāl jo lab-e-ābjū bhī Darī rahī

jo havas farosh the shahr ke sabhī maal bech ke jā chuke

magar ek jins-e-vafā mirī sar-e-rah dharī kī dharī rahī

mire nāqidoñ ne farāz jab mirā harf harf parakh liyā

to kahā ki ahd-e-riyā meñ bhī jo baat kharī thī kharī rahī

tera qurb tha ki firaq tha wahi teri jalwagari rahi

ki jo raushni tere jism ki thi mere badan mein bhari rahi

tere shahr mein main chala tha jab to koi bhi sath na tha mere

to main kis se mahw-e-kalam tha to ye kis ki ham-safari rahi

mujhe apne aap pe man tha ki na jab talak tera dhyan tha

tu misal thi meri aagahi tu kamal-e-be-KHabari rahi

mere aashna bhi ajib the na rafiq the na raqib the

mujhe jaan se dard aziz tha unhen fikr-e-chaaragari rahi

main ye jaanta tha mera hunar hai shikast-o-reKHt se mo'tabar

jahan log sang-ba-dast the wahin meri shishagari rahi

jahan nasehon ka hujum tha wahin aashiqon ki bhi dhum thi

jahan baKHiya-gar the gali gali wahin rasm-e-jama-dari rahi

tere pas aa ke bhi jaane kyun meri tishnagi mein hiras tha

ba-misal-e-chashm-e-ghazal jo lab-e-abju bhi Dari rahi

jo hawas farosh the shahr ke sabhi mal bech ke ja chuke

magar ek jins-e-wafa meri sar-e-rah dhari ki dhari rahi

mere naqidon ne faraaz jab mera harf harf parakh liya

to kaha ki ahd-e-riya mein bhi jo baat khari thi khari rahi