tera shiar teri dhaj mere KHayal mein hai

tirā shi.ār tirī dhaj mire ḳhayāl meñ hai

subhāv ġham meñ mire tamkanat malāl meñ hai

vo terā kaif-e-tabassum vo vālehāna-pan

mire junūñ kī chamak bhī tire jamāl meñ hai

tire takallum-e-rā.anā-o-ḳhush-ḳhayāl kī ḳhair

jo aish zaḳhm meñ thā ab vo indimāl meñ hai

adā-e-nāz se hai terī hijr meñ ab ke

ilāj-e-har-alam-o-yās ehtimāl meñ hai

vo be-ḳhudī hai ki dil meñ samāñ sajā hai koī

firāq Duubā huā masti-e-visāl meñ hai

fuġhāñ ko zamzama kar de junūñ ko shānt kare

ye rang bhī to mire yār-e-ḳhush-ḳhisāl meñ hai

bharosa hī kaf-e-dariyā-e-dil kā kyā 'kāvish'

abhī to maanā ki had meñ hai e'tidāl meñ hai

tera shiar teri dhaj mere KHayal mein hai

subhaw gham mein mere tamkanat malal mein hai

wo tera kaif-e-tabassum wo walehana-pan

mere junun ki chamak bhi tere jamal mein hai

tere takallum-e-raana-o-KHush-KHayal ki KHair

jo aish zaKHm mein tha ab wo indimal mein hai

ada-e-naz se hai teri hijr mein ab ke

ilaj-e-har-alam-o-yas ehtimal mein hai

wo be-KHudi hai ki dil mein saman saja hai koi

firaq Duba hua masti-e-visal mein hai

fughan ko zamzama kar de junun ko shant kare

ye rang bhi to mere yar-e-KHush-KHisal mein hai

bharosa hi kaf-e-dariya-e-dil ka kya 'kawish'

abhi to mana ki had mein hai e'tidal mein hai