tere dard se jis ko nisbat nahin hai

tire dard se jis ko nisbat nahīñ hai

vo rāhat musībat hai rāhat nahīñ hai

junūn-e-mohabbat kā dīvāna huuñ maiñ

mire sar meñ saudā-e-hikmat nahīñ hai

tire ġham kī duniyā meñ ai jān-e-ālam

koī ruuh mahrūm-e-rāhat nahīñ hai

mujhe garm-e-nazzāra dekhā to hañs kar

vo bole ki is kī ijāzat nahīñ hai

jhukī hai tire bār-e-irfāñ se gardan

hameñ sar uThāne kī fursat nahīñ hai

ye hai un ke ik rū-e-rañgīñ kā partav

bahār-e-tilism-e-latāfat nahīñ hai

tire sarfaroshoñ meñ hai kaun aisā

jise dil se shauq-e-shahādat nahīñ hai

taġhāful kā shikva karūñ un se kyūñkar

vo kah deñge tū be-muravvat nahīñ hai

vo kahte haiñ shoḳhī se ham dilrubā haiñ

hameñ dil navāzī kī aadat nahīñ hai

shahīdān-e-ġham haiñ subuk ruuh kyā kyā

ki us dil pe bār-e-nadāmat nahīñ hai

namūna hai takmīl-e-husn-e-suḳhan kā

guhar bāri-e-tabā-e-hasrat nahīñ hai

tere dard se jis ko nisbat nahin hai

wo rahat musibat hai rahat nahin hai

junun-e-mohabbat ka diwana hun main

mere sar mein sauda-e-hikmat nahin hai

tere gham ki duniya mein ai jaan-e-alam

koi ruh mahrum-e-rahat nahin hai

mujhe garm-e-nazzara dekha to hans kar

wo bole ki is ki ijazat nahin hai

jhuki hai tere bar-e-irfan se gardan

hamein sar uThane ki fursat nahin hai

ye hai un ke ek ru-e-rangin ka partaw

bahaar-e-tilism-e-latafat nahin hai

tere sarfaroshon mein hai kaun aisa

jise dil se shauq-e-shahadat nahin hai

taghaful ka shikwa karun un se kyunkar

wo kah denge tu be-murawwat nahin hai

wo kahte hain shoKHi se hum dilruba hain

hamein dil nawazi ki aadat nahin hai

shahidan-e-gham hain subuk ruh kya kya

ki us dil pe bar-e-nadamat nahin hai

namuna hai takmil-e-husn-e-suKHan ka

guhar bari-e-taba-e-hasrat nahin hai