tere darida gareban mein ye rafu kya hai

tire darīda garebāñ meñ ye rafū kyā hai

tujhe ḳhabar nahīñ majnūñ kī aabrū kyā hai

mujhe to aap kī āñkhoñ ne kar diyā sarshār

mujhe ḳhabar hī nahīñ jaam kyā subū kyā hai

na jaane hogā bhī donoñ meñ ittifāq kabhī

mizāj-e-husn hai kyā merī aarzū kyā hai

majāz hai ki haqīqat savāb hai ki gunāh

pata nahīñ ki ye duniyā-e-rang-o-bū kyā hai

lahū to vo hai jo uble shahīd kī rag se

rag-e-gulū se na ublā to phir lahū kyā hai

mujhe hai jurm-e-mohabbat kā e'tirāf 'urūj'

mirī sazā meñ koī bahs-o-guftugū kyā hai

baḌe baḌoñ ke qadam jis maqām par larzeñ

'urūj' tū hī batā us jagah pe tū kyā hai

tere darida gareban mein ye rafu kya hai

tujhe KHabar nahin majnun ki aabru kya hai

mujhe to aap ki aankhon ne kar diya sarshaar

mujhe KHabar hi nahin jam kya subu kya hai

na jaane hoga bhi donon mein ittifaq kabhi

mizaj-e-husn hai kya meri aarzu kya hai

majaz hai ki haqiqat sawab hai ki gunah

pata nahin ki ye duniya-e-rang-o-bu kya hai

lahu to wo hai jo uble shahid ki rag se

rag-e-gulu se na ubla to phir lahu kya hai

mujhe hai jurm-e-mohabbat ka e'tiraf 'uruj'

meri saza mein koi bahs-o-guftugu kya hai

baDe baDon ke qadam jis maqam par larzen

'uruj' tu hi bata us jagah pe tu kya hai